Ǵasyrlyq tarıhy bar aǵa basylym árdaıym óz oqyrmandarymen tyǵyz baılanysta. Bul rette eldiń erteńi sanalatyn jastardy, ásirese bolashaq jýrnalısterdi gazettiń tynys-tirshiligimen tanystyrýdyń mańyzy zor. Osy maqsatqa negizdelgen kezdesýde jas tilshiler ózderin qyzyqtyrǵan saýaldaryn ortaǵa salyp, tolymdy jaýap aldy. Almaty tilshiler qosynynyń meńgerýshisi Nurǵalı Oraz jas shákirtterge qasıetti mamandyqtyń qyr-syry týraly áńgimeledi. Qýanyshpen aıta keter bir jaıt, jýrnalıstıka fakýltetiniń dekany Saǵatbek Medeýbekuly aldaǵy ýaqytta fakýltet qabyrǵasynan «Egemen Qazaqstan» gazeti atyndaǵy aýdıtorııa ashylýy múmkin ekendigin aıtty.
Sondaı-aq basqosý barysynda kúni búgin jurtshylyqqa joldanǵan Elbasy maqalasynyń mán-mańyzy týraly da aıtylmaı qalǵan joq. Maqaladaǵy: «Bul – tarıhqa degen durys ustanym. Sol arqyly túp tamyrymyzdy bilýge, ulttyq tarıhymyzǵa tereń úńilip, onyń kúrmeýli túıinin sheshýge múmkindik týady.» «Rýhanı jańǵyrý» jalpyulttyq baǵdarlamasynyń jańa komponentteri ata-babalarymyzdyń kóp ǵasyrlyq murasynyń sıfrlyq órkenıet jaǵdaıynda túsinikti ári suranysqa ıe bolýyn qamtamasyz ete otyryp, ony jańǵyrtýǵa múmkindik beredi» - degen joldar tarıh pen tanymǵa qatysty talaı syrdy ańǵartady. Keler jyly 100 jyldyq mereıtoıyn toılaıtyn gazettiń tilshileri jas tilshilermen sheberlik sabaǵyn ótkizýi, Elbasynyń osy maqalasyndaǵy oılarmen astasyp jatqandaı boldy.
Saparbaı PARMANQUL,
«Egemen Qazaqstan»
ALMATY
