Is-sharaǵa Túrki kınosyn dúnıejúzine tanytý qaýymdastyǵynyń tóraǵasy, túrkimen kınorejısseri, ssenarıst jáne operator, KSRO Memlekettik syılyǵynyń laýreaty, Túrkimen Respýblıkasynyń halyq artisi Hodjakýlı Narlıev, Túrki álemi jýrnalısteri federasııasynyń prezıdenti Menderes Demır, «Habar» agenttigi AQ «El arna» arnasynyń dırektory Arman Seıtmamyt, «Habar» agenttiginiń bas redaktory Kúlimhan Hasenova, Tájikstan Kınematografıster odaǵynyń tóraǵasy Safar Hakdodov, kınorejısser jáne ssenarıst Alı Hamraev, rejısser, akter, ssenarıst, prodıýser Oktaı Mır-Kasımov, Sháken Aımanov kınofestıvaliniń bas dırektory Ermek Tursynov jáne halyqaralyq kınofestıvalderdiń ókilderi qatysty. Dóńgelek ústeldi prodıýser, NETPAK múshesi, álemdik túrki kınosy qaýymdastyǵynyń atqarýshy komıtetiniń múshesi Kanat Tórebaı júrgizdi.
Kezdesýdi Sháken Aımanov kınofestıvaliniń bas dırektory Ermek Tursynov ashyp, jınalǵan qonaqtardyń jumysyna sáttilik tiledi. Al Túrki kınosyn dúnıejúzine tanytý qaýymdastyǵynyń tóraǵasy Hodjakýlı Narlıev qazirgi zamandaǵy túrki elderiniń kınematografynyń jaǵdaıy týraly sóz qozǵap, ony álemge taratý jolynda qandaı qıyndyqtardyń kezdesetini týraly aıtyp ketti. Túrki álemi jýrnalısteri federasııasynyń prezıdenti Menderes Demır kınematografııa salasynda yntymaqtastyqty damytý úshin eń basty kedergi ortaq tildiń joqtyǵyna toqtaldy.
Sonymen birge, «Habar agenttigi» AQ «El arna» arnasynyń dırektory Arman Seıtmamyt Ortalyq Azııa men túrki álemi elderiniń efırge shyǵatyn fılmderiniń jaǵdaıy men bolashaǵy týraly áńgimeleı otyryp, qazaq telearnalary túrki elderiniń kınosyn kórsetýge daıyn ekendigin jetkizdi.
«Bizdiń qaýymdastyq túrki áleminiń kınosyn dúnıejúzine taratý boıynsha kóp jumys atqaryp otyr. Biz yntymaqtastyqqa árqashan daıynbyz jáne túrki kınosyn álemdik deńgeıge shyǵarǵymyz keledi. Sondyqtan da biz búgingi kezdesýge qazaq telearnasynyń qatysyp otyrǵanyna óte qýanyshtymyz. Ortaq kelisimge kelemiz dep senemin», - dedi Hodjakýlı Narlıev.
«El arna» tek qazaq kınosyn kórsetedi, biraq bıylǵy jyldyń kúzinen bastap biz Ortalyq Azııanyń úzdik kınolaryn kórsete bastadyq. Tájikistanmen tez kelisimge keldik, qazir arnamyzdan olardyń kınosyn kórsetip jatyrmyz. Endi bizge basqa da túrki álemi elderimen yntymaqtastyq ornatý qajet. Biz birigip jumys isteýge jáne túrki álemi elderiniń kınosyn qazaq telearnasynda kórsetýge daıynbyz», - dedi Arman Seıtmamyt.
Kezdesý sońynda Sháken Aımanov kınofestıvali men halyqaralyq kınofestıvalderdiń ókilderi, «Úmit» TMD elderindegi jastar kıno forýmy, «Halyqaralyq Azııa kınofestıvali», «Dıdor» halyqaralyq kınofestıvali, «Halyqaralyq Qazan musylman kınofestıvali» jáne «Túrki elderiniń derekti fılmder festıvali» arasynda yntymaqtastyq týraly kelisimge qol qoıyldy.
Aıgúl AHANBAIQYZY,
ALMATY
