Dıplomat retinde bul máseleniń halqymyzdyń barsha álemmen – jaqyn jáne alys sheteldermen qarym-qatynas tarıhyna da qatysy bar ekendigin atap ótkim keledi. Prezıdent N.Nazarbaev Qazaqstannyń shekaralas memlekettermen aýmaqtyq máselelerin rettedi, kórshiles eldermen jáne iri memlekettermen dostyq jáne strategııalyq seriktestik qatynastaryn ornatty jáne ózara tıimdi aımaqtyq ekonomıkalyq yntymaqtastyq júıesin qurýda. Tarıhtan alǵan sabaqtar Qazaqstandy jahandyq ıadrolyq qarýsyzdaný jáne taratpaý, halyqaralyq deńgeıdegi saıası senimdilik pen yntymaqtastyqty nyǵaıtý, qaqtyǵystar men daǵdarystardy retteý máselelerinde belsendi ári batyl pozısııa ustanýǵa, transulttyq ekonomıkalyq jobalardy ilgeriletýge jeteleıdi.
Elbasynyń «Uly dalanyń jeti qyry» maqalasy Qazaqstan halqyna ǵana emes, halyqaralyq qaýymdastyqqa – akademııalyq toptarǵa, tarıhshylarǵa, mádenıet pen óner qaıratkerlerine, murajaı jáne muraǵat isiniń mamandaryna, jýrnalısterge arnalǵan. Nursultan Nazarbaev álem jurtshylyǵyn dala órkenıetiniń mádenı jáne tarıhı murasyn zertteýge qatysýǵa shaqyrady. Sol sebepti, Syrtqy ister mınıstrligi bul eńbekti álemniń kóptegen tilderine aýdarady.
Sonymen qatar syrtqy saıası vedomstvo Memleket basshysy usynǵan tarıhı sanany jańǵyrtýdyń barlyq jobalaryn iske asyrýǵa belsene atsalysady. О́ıtkeni olardyń barlyǵynyń halyqaralyq mazmuny bar. Syrtqy ister mınıstrligi jáne Qazaqstannyń elshilikteri bizdiń zertteýshilerge asa iri sheteldik arhıvtermen jumys isteýde qajetti kómek kórsetetin bolady. «Uly dalanyń uly esimderi» – bizdiń tanymal, qadirli jáne jer sharynyń ár túkpirinde ulaǵatqa ıe uly ata-babalarymyz. Bizdiń mindetimiz – olardyń beınelerin este saqtaý, olar qaldyrǵan murany zertteý jáne máńgi este qaldyrý. Bizdi 2019 jyly Astana qalasynda Túrkologtardyń dúnıejúzilik kongresin ótkizý jáne túrki tarıhyn zertteý boıynsha elimizdiń jáne sheteldik ǵalymdarmen birlesken úlken jumys kútip tur. Dıplomattar murajaılyq jáne kınematograftyq jobalardy iske asyrýǵa, dala folklory antologııalaryn shetel tilderine aýdarýǵa jáne bizdiń ejelgi ónerimiz ben tehnologııalarymyzdy álemdik deńgeıde ilgeriletýge daıyn.
Bul jobalar bizdiń IýNESKO, ISESKO-men yntymaqtastyǵymyzdy, TMD-men, Túrki tildes memleketterdiń yntymaqtastyq keńesimen jáne basqa da uıymdarmen gýmanıtarlyq saladaǵy qatynastardy kúsheıtip, baıytady.
Biz sondaı-aq qoǵamda zor serpilis týdyrǵan «Rýhanı jańǵyrý» baǵdarlamasy aıasynda Qazaqstanǵa jasalǵan baspasóz týrlaryn uıymdastyrý úderisin jalǵastyratyn bolamyz. Muny biz Memleket basshysy usynyp otyrǵan elimizdiń halyqaralyq bedelin nyǵaıtýǵa, qazirgi zamannyń mádenıetterin ózara jaqyndastyrýǵa jáne baıytýǵa zor úles qosatyn asa úlken jumys dep esepteımiz.
Qaırat ÁBDIRAHMANOV,
Qazaqstan Respýblıkasynyń Syrtqy ister mınıstri
