Qaıta óńdeý ónerkásibi nysanynyń kúnine 10 tonna ónim daıyndaıtyn qýaty bar. Tolyq qýatynda jumys istegende kúnine 3 tonna buqtyrylǵan et, 3 tonna shujyq ónimderi jáne 4 tonna sapaly et daıyndaıtyn bolady.
«Torǵaı óńirindegi bul et kombınatyna osy jerge jaqyn Naýyrzym, Amangeldi, Jangeldi, Arqalyq qalasynyń aýmaǵy jáne qatar jatqan Aqmola, Qaraǵandy oblystarynyń irgeles aýdandarynyń sharýashylyqtary malyn ótkizetin bolady. Sharýa úshin et kombınaty jaqyndyǵymen jáne óńdeý isinde zamanaýı tehnologııasymen utatyn bolady. Endigi mindet – óńirde mal basyn kóbeıtý kerek» dedi oblys ákimi Arhımed Muhambetov.
Zamanaýı et kombınatynyń ashylýyna bıýdjetten shyǵyn shyqqan joq, ol jeke ınvestısııa tartý arqyly múmkin boldy. Kombınatty salǵan «Torǵaı Et» jaýapkershiligi shekteýli seriktestigi barlyǵy 2 mıllıard teńge qarjy saldy. Aldaǵy jyly taǵy bir mıllıard teńgege mal bordaqylaý alańyn salýdy josparlap otyr.
«Jeltoqsan aıynan bastap, sharýashylyqtardan, jeke sektordan mal qabyldaı bastaımyz. Qazir ózimiz elý shaqty mal soıyp, shujyq, qalbyrdaǵy ettiń alǵashqy túrin shyǵaryp kórdik. Mamandardy úıretip jatyrmyz. Maldy tirileı salmaqta 400 kılogramǵa deıin kılogramyn 500 teńgeden, al 400 kılogramnan assa kategorııasyna qaraı 600-650 teńgeden alamyz» dedi «Torǵaı Et» jaýapkershiligi shekteýli seriktestiginiń dırektory Rasýl Muqanov.
Qazir et kombınatynda 60 adam jumys isteıdi, óndiris tolyq qýatyna jetken kezde jumysshylar sany 120 ǵa deıin kóbeıtiledi.
Názıra JÁRIMBET,
«Egemen Qazaqstan»
Qostanaı
