Jıynǵa belgili memleket jáne qoǵam qaıratkerleri, óner maıtalmandary qatysty. Arystanbek Muhamedıuly Elbasy maqalasynda aıtylǵan, atqarylýy tıis jumystardyń árqaısysyna jiti toqtalyp, alda atqarylar ıgilikti sharalarǵa jaýapty mekemelerge naqty tapsyrmalar berdi. Sonymen qatar Memleket basshysynyń alǵa qoıǵan maqsattaryn júzege asyrý jumystary bastalyp ta ketkendigin jetkizdi.
«Bizdiń mınıstrlik – osy baǵdarlamany tikeleı iske asyratyn negizgi memlekettik organ. Nege deseńizder, Altyn adamnyń tarıhyn zertteý bolsyn, ensıklopedııa, mýzeıdi qurý bolsyn – bizdiń mınıstrliktiń quzyryndaǵy sharýa. Sol sebepten búkil mekeme basshylarynyń basyn qosyp otyrys ótkizip jatyrmyz. Aldymyzdaǵy naqty maqsattar aıqyndaldy. Eń tapshy dúnıe – ýaqyt. Elbasynyń ózi ýaqytty tıimdi paıdalaný kerektigin aıtyp otyr. Sol sebepten, osy tarıhı eńbekterdiń aıasynda bir aptanyń ishinde naqty usynystardy berýimiz kerek», – dedi Arystanbek Muhamedıuly Mınıstr halyqtyń kóńilinen shyǵatyn usynystar aıtylyp jatqanyn da jetkizdi. Dımash Qudaıbergenniń Londonda úlken deńgeıde ótken konsertin de atap ótken mınıstr Qasym han týraly da kórkem fılm túsiriletinin aıtty. «Qasym han týraly fılmniń jobasy boıynsha biz kartınanyń ssenarııine tapsyrys berdik. Ssenarııdiń qalaı jazylǵanyna den qoıarymyz anyq. Eger onda Qasym hannyń barlyq erligi men ómiri qamtylsa, ári qaraı jumysty jalǵastyratyn bolamyz. Rejısser «Ertuǵryl» serıalyn túsirgen túrik rejısseri bolady. Ol qazaqstandyq mamandarmen birge ssenarııdi jazyp shyqty.
Qazirgi tańda qazaqstandyq rejısserler iri jobalarmen júr. Aqan Sataev «Tumar patshaıym» fılminiń túsirý jumystaryn aıaqtady. Rústem Ábdirash «Almas qylyshtyń» jalǵasyna kirisip ketti. Álemdik deńgeıge jetý úshin biz moıyndalǵan rejısserler men avtorlardy shaqyrýymyz kerek», deıdi Arystanbek Muhamedıuly.
Baǵashar TURSYNBAIULY,
«Egemen Qazaqstan»
