О́tken táýlikte Astanada tolassyz qar jaýyp, daýyldy eskertý jarııalandy. Osyǵan baılanysty qaladaǵy tasjoldar da jabylǵan bolatyn. Búgin tańerteń qala turǵyndary kommýnaldyq qyzmetterdiń kelýin kútpeı, turǵyn úıleriniń aýlasyn qardan tazartýǵa shyqty.
Saryarqa aýdanynyń aýmaǵyndaǵy Abaı dańǵyly, 1 meken-jaıy boıynsha ornalasqan úıdiń turǵyndary kúndiz aýlasyndaǵy qardy kúrep, jaıaý júrginshiler ótpelderi men balalarǵa arnalǵan alańdardy muzdan tazartty.
«Men bul úıde 2011 jyldan bastap turamyn. О́zimiz turyp jatqan úıdiń aýlasyndaǵy jaǵdaıǵa beı-jaı qaraı almaımyn. Munda bizdiń balalarymyz ósip keledi ǵoı. Keshe kúni boıy qar jaýdy. Joldarda kommýnaldyq qyzmetter belsendi jumys isteýde. Alaıda jaýǵan qar mólsheriniń kóp bolǵany sonsha, kommýnaldyq qyzmetter barlyq aýmaqtardy tazartýǵa úlgermeı jatyr. Keshe kórshilerimizben tańerteń barlyǵymyz bir adamdaı aýlany tazartýǵa shyǵamyz dep uıǵardyq. Aýdan ákimdigine shaǵym túsirmeı, kerisinshe oǵan kómek kórsetken jón emes pe?!», deıdi úıdiń turǵyny Marat Salıev.
Aıta keteıik, sınoptıkter mundaı turaqsyz aýa raıynyń aldaǵy kúnderi de saqtalatynyn eskertedi. 26-27 qarashada elordada kóshpeli bult shyǵyp, keı kezde qar jaýady, burqasyn júrip, kóktaıǵaq bolady dep kútilýde. Ońtústik-batystan soǵatyn jeldiń ekpini 9-14, keı kezde 15-20 m/s jetedi. Aýa temperatýrasy túnde jáne kúndiz -8...-10 gradýsty quraıdy.
