Prezıdenttik orkestrdiń úrmeli aspaptar orkestriniń súıemeldeýimen Memlekettik Kúzet Qyzmetiniń «Aıbyn» polkiniń Qurmet Qaraýyl Rotasy saltanatty sherýmen shara shymyldyǵyn túrdi. «Shyǵarmashylyq. Jasampazdyq. Innovasııalar» kóshpeli kórmesiniń ashylýyna Elbasy kitaphanasy dırektorynyń birinshi orynbasary Ámirhan Rahymjanov pen L.N.Gýmılev atyndaǵy Eýrazııa ulttyq ýnıversıtetiniń rektory Erlan Sydyqov jáne qala turǵyndary men joǵary oqý oryndarynyń oqytýshylary, stýdentteri qatysty.
Saltanatty sharada Ámirhan Rahymjanov jınalǵan qaýymdy alda kele jatqan Tuńǵysh Prezıdent kúnimen quttyqtady. «Búgin alǵash ret Elbasy kitaphanasynyń kóshpeli kórmesi men «Tarıhı tańdaý» ǵylymı-ekspozısııalyq jobasynyń aıasyndaǵy qoǵamdyq-saıası taqyryptaǵy kóshpeli ekskýrsııalarymyzdy, elimizdiń úlken bilim ordasy sanalatyn Eýrazııalyq ulttyq ýnıversıtetinde ashqaly otyrmyz. Qundy materıaldar ustazdar men stýdentter qaýymyna rýhanı turǵydan bereri az bolmas dep senemin», dedi Ámirhan Rahymjanov. Sondaı-aq ol halqymyzdyń joralǵysy boıynsha Memleket basshysynyń eńbekteri men ol týraly jazylǵan shyǵarmalardan turatyn kitaptar kolleksııasyn syı retinde ala kelgenin aıtty. 100-den astam kitaptan turatyn kolleksııanyń quramynda Elbasymyzdyń álem tilderinde jaryq kórgen eńbekteri men Prezıdenttiń ómiri men qyzmetin qamtıtyn, «Nursultan Nazarbaev. О́mirbaıan», «Qazaqstan Respýblıkasynyń Tuńǵysh Prezıdenti Nursultan Nazarbaev. Qyzmet hronıkasy», «Tańdamaly sózder» jáne Elbasymyzdyń parasatty paıymdaýlary men oı-tolǵanystarynan turatyn «Uly dala ulaǵattary» atty kitaptar bar.
«Tuńǵysh» – Qazaqstan Respýblıkasy Prezıdentiniń jasampaz kóshbasshylyǵynyń dáleli. «Tuńǵysh» – bizdiń jańa zaman tarıhymyz. «Tuńǵysh» – dástúr sabaqtastyǵynyń jalǵasy. Elimiz rýhanı jańǵyryp, órisimiz keńeıtip jatqan tusta, Elbasynyń «Uly dalanyń jeti qyry» atty tujyrymdamalyq eńbegi bizdi taǵy da ótken men búginniń tizginin teń ustaýǵa jumyldyryp otyr», dedi kórmeniń ashylý rásiminde sóz alǵan L.N.Gýmılev atyndaǵy EUÝ rektory Erlan Sydyqov. EUÝ rektorynyń aıtýynsha, «Tuńǵysh» kórmesiniń Kúltegin atrıýmynan bastalýynyń rámizdik máni bar. О́ıtkeni, bul jádiger Elbasy yjdaǵatynyń arqasynda elordanyń bas ýnıversıtetine der kezinde jetkizildi.
Kóshpeli ekskýrsııalyq kórme osy jyldyń 20 jeltoqsanyna deıin «Tarıhı tańdaý. Bastaý», «Tarıhı tańdaý. О́rleý», «Elbasy mártebesi – el mártebesi», «Atameken» degen taqyryptarmen ótkiziledi. Kórmede Memleket basshysyna eren eńbegi men jahandyq bastamalary úshin berilgen qoǵamdyq nagradalar kesheni usynylady. Sondaı aq Elbasynyń 90-jyldardan bastap bilim salasyndaǵy eńbekteri, shetel ýnıversıtetterinde oqyǵan dáristeri men Eýropa, Amerıka jáne Azııa elderiniń bedeldi joǵary oqý oryndary men ǵylymı mekemelerinen tartý etilgen 25 mantııa qoıylǵan.
Aıta ketý kerek, kóshpeli ekskýrsııalardyń formaty qatysýshylarǵa biregeı materıaldar jıyntyǵymen tanysýǵa, onyń ishinde Elbasynyń tarıhı jolyn ashatyn beıne hronıkanyń sırek kadrlaryn, fotosýretter men muraǵattyq qujattaryn jáne murajaı eksponattaryn qolmen ustap kórýge múmkindik beredi.
Aqmaral AǴZAMQYZY,
«Egemen Qazaqstan»
