Bul týraly búgin Qazaqstan Respýblıkasy Prezıdentiniń janyndaǵy Ortalyq kommýnıkasııalar qyzmetinde ótken brıfıngte Shymkent qalasynyń ákimi Ǵabıdolla Ábdirahymov málimdedi.
Munan bylaı qala ákimi halyqpen aıyna bir emes, tórt ret kezdesedi. Jeke máseleler boıynsha qabyldaýǵa jazylý úshin qala turǵyndary ákimdik keńsesine kelmeı-aq, shymkent.gov.kz saıtyna onlaın jazylý arqyly tirkele alady.
«Jergilikti bılik pen halyq arasyndaǵy ózara qarym-qatynasty arttyrý maqsatynda men azamattardy jeke qabyldaýdy ár juma kúni saǵat 16.00-den 18.00-ge deıin ótkizý týraly sheshim shyǵardym. Sonymen qatar, azamattarǵa yńǵaılyly bolý úshin ákimdik ǵımaratynyń birinshi qabatynda zamanaýı kabınet jabdyqtadyq», - deıdi Ǵabıdolla Rahmatollauly.
Sondaı-aq brıfıng barysynda qala meri megapolıstegi iske asyp jatqan aýqymdy jobalarmen tanystyryp ótti. Atap aıtar bolsaq, búldirshinderdi onlaın rejıminde balabaqshaǵa kezekke qoıý, birinshi synyp oqýshylaryn mektepke qabyldaý, «7-20-25» baǵdarlamasy boıynsha turǵyn úı satyp alýǵa bastapqy jarnany sýbsıdııalaý boıynsha iske asqan jobalar basqa óńirlerge de tájirıbe retinde usynylyp jatqandyǵyn jetkizdi.
Esterińizge salar bolsaq, úshinshi megapolıs basshysynyń turǵyndarmen kezdesetin kabıneti ashyq shyny terezelerden jasalǵan.
Nurshat TО́KEN,
«Egemen Qazaqstan»
