Sýretter: baq.kz
Jaqynda Elbasynyń qatysýymen resmı ashylýy bolǵan Astana hub halyqaralyq IT startaptar tehnoparki kúni keshe elimizge álemniń ár tarapynan týrıster men kórermender jınap, elorda atyn sharyqtatqan EKSPO aýmaǵynda ornalasqan.
Negizi jumysyn bir jyl buryn bastaǵan tehnopark búginde 150-ge jýyq startaptyń ordasyna aınaldy. Tórt qabatty ǵımaratta elimizdiń erek oıly tarlandary jınalyp, kásipkerlikke alǵashqy qadamdaryn jasaýda.
«Zerde» ulttyq ınfokommýnıkasııa holdıngi» aksıonerlik qoǵamy qarjylandyratyn Astana hub IT startaptar tehnoparkin kásipkerlik mektebi desek te bolady. О́ıtkeni ortalyq jas kásipkerlerdi 6 nemese 12 aı kóleminde shart boıynsha, aqysyz jumys alańymen, sheberhana, jetekshiler men biliktilikti arttyrý kýrstarymen qamtamasyz etedi. Bul jerde tek jumys istep qoımaı, zamandastarymen, áriptesterimen pikir almasyp, joba týraly oılaryn bilýge múmkindik bar. Tipti, eki top birigip, birneshe jobany bir arnaǵa toǵystyrǵan jaǵdaılar da bolǵan. Qazirgi tańda 25 startap naryqqa shyǵyp, kásipke aınalyp úlgergen.
Sonymen qatar IT salasyn damytýǵa baǵyttalǵan startap paıda ákeletin kásipke aınala bastaǵanda memleket tarapynan birqatar kómek kórsetilip, salyqtan bosatylýyn qamtamasyz etedi. «Bul kompanııalarǵa jumys isteýge jiger berip, salany damytýǵa úlken úles qosady», deıdi «Zerde» AQ basqarma tóraǵasynyń orynbasary Pavel Koktyshev.
«Qazir startaptyń hard ware jáne soft ware dep atalatyn eki túri bar. Hard ware startaptarǵa robot, vırtýaldy kózildirikter jatady. Soft ware startaptar – qalta telefonyna, qyzmet kórsetýge arnalǵan baǵdarlamalar. Bizde startaptyń eki túrine de jaǵdaılar jasalǵan. 3D prıntermen, zamanaýı qurylǵylarmen jabdyqtalǵan sheberhanalarymyz bar», deıdi Astana hub-tyń qoǵammen baılanys bóliminiń jetekshisi Aıgúl Shernııazova.
Kásipkerler kúndelikti monıtorıngten ótip, jarty jyl ishinde naqty nátıjeler kórsetýi kerek. Olardyń osy saladaǵy shetelden arnaıy shaqyrtylatyn tájirıbeli mamandarmen jumys isteýge múmkindikteri bar. Ár eki apta saıyn máskeýlik sarapshylar suraqtaryńyzǵa jaýap berip, jobańyzǵa túzetýler engizedi. Budan bólek túrli sheberlik saǵattary, qosymsha biliktilikti arttyrý kýrstary ótkizilip turady.
Astana hub-tyń kásipkerlerdi oqytý júıesiniń eki túri bar. Birinshisi – ınkýbasııa. Bıznes-ınkýbator 6 aı oqý-daıarlaý baǵdarlamasy men otandyq sarapshylardyń kómeginen turady. Ekinshisi – akselerasııa. Bul kezeńde kásipkerler 3 aılyq oqý baǵdarlamasynan ótip, startap-jobalaryn damytý kezeńinen ótedi. Olarǵa arnaıy keńesshiler taǵaıyndalady. Keńesshiler jobalardy damytýǵa, qatelikterdi túzetip, jobanyń jańa kezeńge ótýine kómektesedi. Dál osy kezeńde ınvestısııa tartý da kózdelgen.
«Alǵashqy baǵdarlama aıasynda 14 joba qolǵa alynyp, 10 túlegimiz jaqsy nátıje kórsetti. Sonyń arqasynda 28 mıllıon ınvestısııa tartyldy. Jaqynda ǵana «Clockster» jobasy sıngapýrlyq ınvestorlardyń nazaryna iligip, 250 000 AQSh dollary kóleminde ınvestısııa tartty. Investısııa kólimin 2 mıllıon AQSh dollaryna deıin ulǵaıtýdy josparlap otyrmyz», deıdi Pavel Koktyshev.
«Qazirgi tańda tehnopark startaptarynyń 30 paıyzy sheteldik kásipkerlerge tıesili. Bul otandyq ekonomıkaǵa óte tıimdi. О́ıtkeni olardyń jobalary memleketke salyq tólep, elimizde jumys orynyn kóbeıýine úles qosady. Odan bólek álemdegi úlken Nokia, Huawei syndy úlken korporasııalar ókildikterin ashyp, jas kásipkerlerge baǵyt-baǵdar berip otyrady. Jyl sońyna deıin 35 top oqýyn aıaqtaýy kerek. Bylaı aıtqanda, Astana hub kásipkerler men memleket arasyndaǵy moderator. Tehnopark jumys alańymen qamtamasyz etip, úlestirýshi qyzmetin atqarady», deıdi Astana hub halyqaralyq IT startaptar tehnoparki dırektory Ádilet Nurǵojın.
Astana hub tálimgerleriniń biri – Jeńis Izmaǵanbet. Ol dosy Dáýlet Aıtmahanovpen birge «Iis sý» jobasyn bastaǵan. Álemdik brendterdiń ıis sýlaryn jańa formatta usynyp júrgen jastar jobany tek ekeýi júrgizedi. Átirlerdi yńǵaıly qutyda, tıimdi kólemde, qoljetimdi baǵamen jetkizip berýge baǵyttalǵan startaptyń jumysyn bastaǵanyna úsh aı bolypty. Bul oı Dáýletke mektep kezinde-aq kelgen. Búginde tehnopark ǵımaratynda jumys isteıtin jas startapty Astana hub jaqynda shıkizat saqtaıtyn, átirlerdi quıýǵa qolaıly jańa orynmen qamtamasyz etpek. Shıkizat satyp alý, olardy quıý, jarnama, esep, logıstıka máselelerin túgeldeı ekeýi dóńgeletip otyrǵan olar Astana hub-tyń kásipterine kóp paıdasy bolǵanyn aıtady.
Budan bólek Astana hub qaramaǵynda «Antidolg.kz», «Kompra», «Tourcenter», «HomeFix», «Workis» «Mediascanner», «Eventum.one» startaptary jumys isteýde.
Sonymen, Astana hub elimizdegi ınnovasııa men IT salasyn damytýǵa baǵyttalǵan kásipkerler mektebi deı alamyz. Tehnopark – kommersııalyq joba emes, memleket pen kásipkerler arasyndaǵy moderator, úılestirýshi. Astana hub basshylyǵynyń aıtýynsha, aldaǵy 5 jylǵa naqty jospary qurylǵan startaptar mekeni elimizdegi ár salanyń IT júıesin damytatyn, halyq ómirin jaqsartýǵa baǵyttalǵan jobalardyń ordasyna aınalmaq.
Svetlana ǴALYMJANQYZY,
«Egemen Qazaqstan»
