Buryn túrli óndiris oryndaryna jazǵy-qysqy ýaqytta is-tájirıbeden ótýge sabylatyn jastar endi arnaıy agrarly aımaqtan alystamaıdy. Zamanaýı tehnıkalar men jyldyń tórt mezgiline ónim beretin jylyjaı, ósimdik qory baı tuqymbaq, tórt túlikke arnalǵan arnaıy zerthana, veterınarlyq emhana, jemis saqtaıtyn qoıma, bıogýmýs bári 5,5 gektar aýmaqty quraıtyn oqý-óndiristik bazasynda shoǵyrlanǵan. Mundaǵy tirliktiń kóbi derlik arnaıy tehnıka kómegimen atqarylady. Jas izdenýshige qalǵany jatpaı-turmaı bilim alý, ózin-ózi jetildirý ǵana.
Zaman talabyna saı jabdyqtalyp, jas urpaqqa kásiptik bilim berip kele jatqan oqý ordasyna Túrkistan oblysyna issaparmen kelgen Bilim jáne ǵylym mınıstrliginiń ókilderi arnaıy at basyn buryp, kolledj ujymynyń jetistikterimen tanysty.
Sapar barysynda Bilim jáne ǵylym mınıstriniń keńesshisi Maırash Taıkenova, BǴM tehnıkalyq jáne kásiptik bilim berý departamenti dırektorynyń orynbasary Ǵalııa Dáýletova, BǴM «Aqparattyq-taldaý ortalyǵy» AQ-nyń BAQ jáne halyqpen jumys júrgizý boıynsha departament dırektory Eldar Túlekov bilim alýshylardyń boıynda ulttyq qundylyqtardy qalyptastyrý maqsatynda jabdyqtalǵan «Rýhanı jańǵyrý» kórmesimen, «Start-APP» bıznes-ınkýbatorymen tanysyp, kolledjdiń kovorkıng ortalyǵynda belsendi jastarmen kezdesti.
«IT quzyrettilik mindetti túrde barlyq mamandyqqa ený kerek. Bul – eń birinshi oqý baǵdarlamalarynyń mazmunyna kiretin dúnıe. Byltyr mamandyqtardyń qataryna «aqparattyq qaýipsizdik» degen mamandyqty engizdik. Biz osy júıemen kásiptik jáne tehnıkalyq baǵytta kadr daıyndaımyz. Sondyqtan muǵalimderdiń biliktiligin arttyratyn oqýlyq baǵdarlamalarynyń mazmunyna IT quzyrettilikti engizip otyrmyz», deıdi BǴM tehnıkalyq jáne kásiptik bilim berý departamenti dırektorynyń orynbasary Ǵ.Dáýletova.
Jýyrda Túrkistan joǵary agrarlyq kolledjinde «Stýdentterge qyzmet kórsetý ortalyǵy» ashylǵan bolatyn. Is-sapar barysynda mınıstrlik ókilderi 40-tan asa memlekettik qyzmet túrin usyna alatyn ortalyqtyń jumysymen tanysty.
Kolledj oqytýshylary men kámelet jasyna tolǵan bilim alýshylar jeke kýálikke arnalǵan kartreıder arqyly ESK (elektrondy kilt) portalyna kirip, ózderine qajetti qujat túrlerin alatyn bolady. Osylaısha stýdentter «Elektrondy úkimet» portaly arqyly kórsetiletin memlekettik qyzmetterdi alý múmkindigine qol jetkizip otyr. Máselen, búgingi tańda stýdentter úshin «AGRAR-APP» mobıldi qosymshasy jumys isteıdi. Iаǵnı, stýdentter mobıldi qosymsha arqyly sabaq kestesimen, ózderiniń aǵymdaǵy jáne qosymsha baǵalarymen tanysa alady. Yńǵaıly ári qoljetimdi mobıldi qosymsha bilim alýshylardyń anyqtamalar men basqa qujattardy alýyna múmkindik týdyryp otyr.
Bilim mekemesi basshysynyń aıtýynsha, ortalyqtyń jumysyn tıimdi júrgizý úshin kolledj mamandary HQKO taǵylymdamadan ótip, arnaıy sertıfıkattarǵa ıe bolǵan. Sondaı-aq ortalyqtyń ashylýymen 2000-ǵa jýyq stýdenttiń ýaqytyn únemdeýge jol ashyldy. «Sıfrly Qazaqstan» baǵdarlamasy negizinde stýdentterdiń alańsyz bilim alýyna múmkindik beretin «SMART-kolledj» baǵdarlamasy engizilgen.
Buǵan qosa, «О́rkenıet» bastaýysh uıymynyń qoldaýymen stýdentter bul ortalyqta Tassaı turǵyn alabynyń turǵyndaryna qyzmet kórsetetin bolady. Sondyqtan bul bastamany oblystyń barlyq oqý oryndarynda engizse de artyq bolmaıdy.
Búginde agrarlyq kolledj eńbek naryǵyna «ımmýnıteti» joǵary mamandar daıarlaý úshin sheteldik birneshe seriktes kompanııalarmen birlese otyryp, jańa bilim berý baǵdarlamalaryn engizýdi qolǵa alǵan. Kolledj basshysy Gaýhar Bekbergenova sheteldik úzdik kolledjderdiń oqý tájirıbesin basty baǵdarǵa alǵanyn aıtady. Bul úshin oqý ordasynyń materıaldyq-tehnıkalyq bazasy zaman qajettiligine saı tolyq jabdyqtalǵan. Atalǵan bilim ordasy 2016 jyldan bastap úsh tilde oqytý júıesine kóshken.
Kolledj muǵalimderi aǵylshyn tilin meńgerý úshin ár oqý jylynyń sońyna qaraı arnaıy kýrstan ótedi eken. Bilimin jetildirip bolǵan soń olar Almaty jáne Astana qalalarynda synaq tapsyrady. 15 túrli kásip ıesin oqytyp jatqan Túrkistan agrarlyq kolledji janynan aýyspaly egistik tanaby, júzim alqaby, mashına-traktor stansasynyń bazasy jasaqtalǵan.
Issapar barysynda mınıstrlik ókilderi maqtaýly kolledjdiń oqý óndiristik bazasynyń jumysymen tolyqtaı tanysyp, otandyq agrosektorǵa bilikti kadr daıyndaıtyn ujymdaǵy atqarylyp jatqan jumystarǵa oń baǵa berdi.
Nurshat TО́KEN,
«Egemen Qazaqstan»
Túrkistan oblysy
