ALDA JARYSTYŃ QYZYǴY – MARAFON

Bul kúnderi jankúıer bitkenniń barlyǵy Vankýverdegi “Kanada Hokkeı Pleısti” jaǵa­lap júr. Rasynda da aǵylyp kelip jatqan adamdarda san joq. О́ıtkeni, aıtýly sport kesheninde shaıbaly hokkeıden jartylaı fınaldyq básekeler ótedi. Al úıeńkiler eliniń turǵyndary hokkeı dese ishken astaryn jerge qoıatyny beseneden belgili. Shırek fınalda Reseıdiń kúl-talqanyn shyǵarǵan Kanada hokkeı­shilerin qazir jurt alaqan­daryna salyp aıalaýda. Bul kúnderi Sıdnı Krosbı, Raıan Geslav, Korı Perrı, Patrık Marlo, Rık Nesh, Djo Tornton, Djerom Igınlý, Erık Staal, Dennı Hıtlı jáne Roberto Lýngo syndy bir top oıynshy­lardyń sýretteri gazet-jýrnal­dardyń birinshi betterinen túsetin emes. Ol az deseńiz, aıdyn ıeleri­niń Reseı quramasyn qys­paq­qa alyp, shaıbany qaqpaǵa dál soǵyp jatqanyn jergilikti telear­nalar qaıta-qaıta qaıtalaýda. Kezdesý barysyndaǵy bas bapker Vıacheslav Bykov pen orystardyń maqtanyshy Aleksandr Ovechkın jáne Evgenıı Malkınniń sharasyz kúıi de kógildir ekrannan jıi qylań berýde. Mine, ejelgi qarsy­lasy – Reseımen bolǵan kezdesýge Kanada jurtshy­lyǵy osyndaı úlken mán berdi. Alaıda, aqtyq aıqastyń jol­damasy olardyń ýysyna ońaı túsedi dep eshkim nyq senimmen aıta almaıdy. О́ıtkeni, Slovakııa quramasy da ózderin bul Olım­pıadada jaqsy qyrynan kórsete bildi. Toptyq básekede olar Reseıdi utsa, shırek fınalda Shvesııanyń “shańyn shyǵardy”. Kanadaǵa qarsy match qarsańynda shaǵyn ǵana Slovakııanyń órenderi “ólispeı-berispeımiz” dep bilek túrinip otyr. Kelesi jartylaı fınalda AQSh pen Fınlıandııa kezdesedi. Amerıka quramasynyń da Olımpıadanyń bas júldesin almaǵanyna tabany kúrekteı 30 jyl ótken eken. Sonaý 1980 jyly Leık Plesıdte kileń stýdentterden quralǵan ujym áıgili KSRO quramasyn qapyda qaldyr­ǵanyn kózi qaraqty kórermender umyta qoımaǵan bolar. Al Fınlıan­dııa kóńil-kúıdiń komandasy. Olar birde jasyndaı jaryq etse, birde súreńsiz oı­naı­dy. Alaıda soń­ǵy tórt Olım­pıa­danyń úsheýin­de olar júl­deli oryn­dardy oljala­dy. 2006 jyly Týrınde kúmis medaldi ıe­len­gen bolatyn. Fın­der bul jo­ly keminde sol nátıjeni qaı­talaımyz dep qulshynýda. Al qyzdar arasyndaǵy hokkeı týrnıri óz máresine jetti. Fınalda Kanada men AQSh kúsh synasty. Tartysqa toly match alań ıeleriniń paıdasyna sheshildi. Úshinshi oryn úshin básekede Fınlıandııa men Shvesııa negizgi ýaqytta teń oına­dy. Overtaımda 3:2 esebimen alǵashqylary jeńiske jetti. Keshe sportshylar alty medaldar jıyntyǵy úshin talasqa tústi. Bizdiń sportshylar sonyń tek bireýinde ǵana baq synady. Atap aıtsaq, Qazaqstannyń qyzdar komandasy 4 h 5 estafetalyq qashyqtyqta óner kórsetti. Shańǵy sportynan ulttyq quramanyń bas bapkeri Aleksandr Batıaıkın Svetlana Malahova, Oksana Iаskaıa, Elena Kolomına jáne Tatıana Roshınaǵa senim artýdy jón sanady. Jasyratyny joq, dál qazir bizdiń qyzdar álemniń mań­daıaldy komandalarymen úzeńgi qaǵystyratyn jaǵdaıda emes. Onyń obektıvti jáne sýbektıvti sebepteri bar. Biraq alǵashqy ondyqqa enýge tıis edik. Sony bapkerler shákirtteriniń qulaǵyna myqtap sińirdi. Ná­tıjesinde mamandar aıtqan jora­mal aına-qatesiz keldi. Qazaqstan quramasy 10-oryndy ıelendi. Búgin bıatlonnan 4 h 7,5 esta­fetasy ótedi. Qazaqstannyń erler komandasy bul synda mynadaı quramda óner kórsetedi: Iаn Savıs­kıı, Dıas Keneshev, Nı­kolaı Braı­chenko jáne Alek­sandr Chervıa­kov. Al 27-28 aqpanda shańǵydan marafondyq básekeler ótedi. Áıelder – Svetlana Malahova, Oksana Iаskaıa, Elena Kolomına jáne Elena Antonova 30 shaqy­rymǵa júgirse, erler – Nıkolaı Chebotko, Sergeı Cherepanov, Alekseı Poltoranın jáne Evgenıı Velıchko 50 shaqyrymdyq saıysta kúsh synasady. Ǵalym SÚLEIMEN, arnaıy “Egemen Qazaqstan” úshin – Vankýverden.