Naǵyz kórkem týyndy ýaqyt ólshemine baǵynbaıdy. Osydan jarty ǵasyr buryn Aısha Ǵalymbaevanyń qalamynan tamǵan «Qazaqstan ánderi» atty osy bir otty kartına óz kezinde qalaı joǵary baǵalansa, qazir de mýzeı qabyrǵalaryndaǵy janymyzǵa jyly ushyraıtyn biregeı týyndylardyń kósh basynda tur. Qoltańbadan sýretshi ulttyq kórkemdik mánerdi alǵashqy orynǵa qoıǵanyn anyq ańǵaramyz.
Alystan bolymsyzdaý ǵana kóringen aqar-shaqar shyńdar dalanyń keńdigin áıgilese, aınalany kómkergen jasyl barqyt belder tabıǵat ananyń kórpesindeı kórkem kórinis beredi. Zaý bıikke moıyn sozǵan balapan shyrshalar qyzǵaldaq qyzdardyń qyrmyzy únine tamsana qulaq túrgendeı. Arýlarǵa saıa bolǵan alyp alma aǵashynan tógilgen aq ulpa gúlder ánmen birge arman qanatyna ilesip alysqa ushady. Qyzdardyń ústindegi appaq búrmeli kóılek aq aıdyn sekildenip, arýlar sol aıdynda aq qanatyn kergen aqqý qusqa uqsaıdy. Aıdynda qalyqtaǵan aqqý án aq sáýlege ulasyp, dombyra shanaǵynan tógilgen salqar sezim saıyn dalany salqyn lebimen aıalaıdy. Boıjetkenderdiń bilekteı burymy erkindikti, keńdikti elestetedi.
«Aısha apamyzdyń eń bir irgeli shyǵarmasyna balanatyn bul týyndy ártúrli tústerge baı. Shyǵarmanyń kompozısııalyq sheshimi aspannan nur bop quıylyp túsip jatqandaı kórinedi. Jaıbaraqat, jaımashýaq kóńil kúı yrǵaǵy qazaq qyzdarynyń ónerge baı ekenin, kóńili keń ekenin barynsha ashyp kórsetken. Ádette aq túspen jumys isteýdiń qanshalyqty qıyn ekenin kez kelgen sýretshi bilýge tıis. Aısha Ǵalymbaeva aq tústi sátti paıdalaný arqyly kartınanyń ajaryn ashqany naǵyz sheberge tán qaıtalanbas qoltańba dep aıta alamyz. Kartınanyń mán-mazmuny qazaq halqymen birge jasaı bermek», deıdi Qazaqstan Sýretshiler odaǵynyń múshesi Shattyq Batan.
Arman OKTIаBR,
«Egemen Qazaqstan»
ALMATY
