«Around the World» («Dúnıejúzilik saıahat») dep atalǵan konserttik baǵdarlama eki saǵatqa sozylyp, naǵyz mýzykalyq saıahatqa aınaldy. Bul keshte álemniń 13 eliniń mádenıetin asqaqtatqan 24 mýzykalyq týyndy oryndaldy. Ásirese orkestr repertýarynda ulttyq mura men álemdik trend ǵajap úılesimdi shyqty. Sahnada halqymyzdyń dástúrli ánderi men kúıleri ǵana emes, sheteldik pop-hıtter men tanymal saýndtrekterdiń aspaptyq kaverleri shyrqaldy.
Aıta keteıik, konsertke mýzykalyq aspaptardyń biregeı quramy aıryqsha ajar berdi. Bir sahnada dombyra, sherter, qobyz, sybyzǵy, jetigen sııaqty qazaqtyń ulttyq aspaptarymen qatar, skrıpka, vıolonchel, fleıta, saksofon, fortepıano, elektro jáne bas gıtaralar, barabandar men túrli perkýssııany qamtıtyn klassıkalyq jáne zamanaýı aspaptar keremet úılesim tapty.
Keshke qatysqan ýnıversıtettiń akademııalyq basshylyǵy da atqarylǵan jumystyń aýqymyn óte joǵary baǵalady. Aıtalyq, NU prezıdenti, professor Vakar Ahmad bilim alýshylardyń jan-jaqty damýynyń mańyzyna toqtaldy.
«Stýdentterimizdiń mýzykalyq kásibı deńgeıi tańǵalarlyq dese bolady. Eger sahnada stýdentter orkestri óner kórsetip jatqanyn bilmesek, ony ajyratý múmkin emes edi. О́z basym stýdenttermen maqtanamyn. Olar ınjener jáne ǵalym bola turyp, sonymen birge tamasha mýzykant ári ártis bola alady. Kásibı ortada biz qoldanatyn kóptegen daǵdy – ýaqytty basqarý, komandada jumys isteý. Sondaı-aq kóshbasshylyqty óz moınyna alý sekildi qasıetter oqý aýdıtorııasynan tys jerde qalyptasady», dedi ol.
Al NU «Orchestra» klýbynyń prezıdenti Arsen Eltaı stýdentter uıymynyń ýnıversıtetten tys jerde myń jarym kórermendi qalaı jınaı alǵan qupııasymen bólisti.
«Bunyń artynda úlken komandalyq jumys turdy. Sondaı-aq myqty tujyrymdama, sapaly vızýal, áleýmettik jelidegi belsendilik, túlekterimiz ben seriktesterimizdiń qoldaýy bizge dem berdi. Konsert óz kórermenin tabady dep sendik. Biraq 1500 adam jınalyp, tolyq anshlag bolýy bizge qýat berip, shabyttandyrǵan nátıje boldy», dedi A. Eltaı.
Sonymen birge Arsen tájirıbeli stýdentterdiń jyl saıyn oqý bitirip, olardyń ornyna jańadan túlekterdiń kelýine qaramastan, orkestrdiń kóptegen jyl boıy kásibıliktiń osyndaı joǵary deńgeıin qalaı saqtap kele jatqany týraly suraqqa da jaýap berip, ishki dástúrdiń mańyzyn erekshe atap ótti.
«Meniń oıymsha, bizdiń basty kúshimiz adamdar men ónerde der edim. Iá, jyl saıyn myqty mýzykant stýdentter oqý bitiredi. Olardyń ornyna 1-kýrs stýdentteri keledi. Biraq oqý ornynda tálimgerlik jumys júıeli jolǵa qoıylǵan. Joǵary kýrs stýdentteri jańadan oqýǵa túsken jastardy orkestr quramyna qabyldap, olarǵa mýzykalyq jaǵynan ǵana emes, sonymen birge «Orchestra» klýbynyń rýhyn sezinýge kómektesedi. Osynyń arqasynda dybystalý deńgeıimiz ben jumysqa degen kózqarasymyz saqtalady. Eń baǵalysy – túlekterimizdiń kóbi ýnıversıtet bitirgennen keıin de bizben baılanysyn úzbeıdi. Únemi qoldaý kórsetedi. Konsertke keledi. Keıde túrli jobalarǵa da qatysady. Mine, osy jastardyń arasyndaǵy sabaqtastyqty qalyptastyrady», dedi Arsen Eltaı.
Shynynda, Beıbitshilik jáne kelisim saraıynyń sahnasyndaǵy stýdentter orkestriniń sátti debıýti NU stýdenttik bastamalarynyń jańa sapaly deńgeıge kóterilgenin, sondaı-aq bıik maqsatty jobalardyń kásibı deńgeıde júzege asyp jatqanyn dáleldedi. NU «Orchestra» stýdentterdiń ár býynyn mýzykaǵa degen súıispenshilikpen biriktirip, ýnıversıtettiń shyǵarmashylyq qýatynyń rámizi bolyp qala beredi.
