Alqaly jıyn avtordyń ǵylymı-shyǵarmashylyq eńbekterine arnalǵan kórmeden bastaldy.
Is-sharaǵa Májilis depýtattary, Mádenıet jáne aqparat, Ǵylym jáne joǵary bilim, Oqý-aǵartý mınıstrlikteri, Jazýshylar odaǵy men Shyǵys Qazaqstan, Abaı oblysy ákimdikteriniń ókilderi, sondaı-aq Reseı, Túrkııa, Qyrǵyzstan, О́zbekstan elderinen jáne otandyq joǵary oqý oryndarynan kelgen ǵalymdar, jas zertteýshiler men ádebıet salasynyń mamandary qatysty.
Jıynǵa moderatorlyq etken aqyn, Májilis depýtaty Amanjol Áltaı ǵalymnyń shyǵarmashylyqtaǵy ár qyryna toqtalyp ótti.
«Ǵylym tappaı maqtanba, oryn tappaı baptanba…» degen ustanymdy ómirine temirqazyq etken ǵalymnyń basty qyrlarynyń biri – ǵylym salasy. Ol uzaq jyl boıy ádebıettaný ǵylymynyń órinde eńbek etip, ózindik orny bar iri zertteýshige aınaldy. Ǵalymnyń qalamynan týǵan monografııalar, oqý quraldary, oqýlyqtar men ondaǵan jyl boıy úzdiksiz jarııalanyp kele jatqan ǵylymı maqalalar onyń ǵylymdaǵy bıik bedelin aıqyndaıdy. Ǵalymnyń kelesi bir qyry – ustazdyq. Myńdaǵan shákirt tárbıelep, olardyń elimizdiń túrli salasynda tabysty eńbek etip júrgen bilikti mamandarǵa aınalýyna jol ashty. Al úshinshi qyry – aqyndyq bolmysy. Ol qazaq ádebıetinde Farıza Ońǵarsynova syndy iri tulǵalardyń izin jalǵap, poezııa áleminde bıik deńgeıge kóterildi», dedi ol.
Mereıtoı ıesine Memleket basshysy Qasym-Jomart Toqaevtyń Alǵysy tabystalyp, «Altyn barys» tósbelgisimen marapattaldy. Senat tóraǵasy Máýlen Áshimbaev, Májilis tóraǵasy Erlan Qoshanov, Memlekettik keńesshi Erlan Qarın, Astana qalasynyń ákimi Jeńis Qasymbek, ózge de memlekettik organdar men joǵary oqý oryndary basshylarynyń quttyqtaý hattary oqyldy. Sondaı-aq ǵalym eńbek etip júrgen L.N.Gýmılev atyndaǵy Eýrazııa ulttyq ýnıversıteti tarapynan arnaıy «Gýmılev» medalimen marapattaldy.
Jıyn barysynda otandyq jáne sheteldik ǵalymdar baıandama jasap, Janat Áskerbekqyzynyń eńbekteri ádebıettaný, poetıka jáne ulttyq ádebı úderis turǵysynan keńinen talqylandy.
Fılologııa ǵylymdarynyń doktory Serik Negımov baıandamasynda aqynnyń aıshyqty kórkem tilin, oı mazmunyn taldady.
«Aqyn Janat oıyn tuzdyqtap, áserli jetkizý oraıynda metaforalyq sóz tirkesterin sheberlikpen qoldanady: elik sezim, bóri tún, sybyzǵy syr, qulyn kún, kúlik kún, juldyz kórpe, qobyz keýde, quıyn taǵdyr, táńir ýaqyt jáne t.s.s. Zadynda, aqyn poetıkasyna kórkemdik-fılosofııalyq, tarıhı-áleýmettik, etnolıngvıstıkalyq, etnografııalyq, polıfonııalyq, mıfologııalyq qundylyqtar tán. Sheberlik pen tapqyrlyq – poezııalyq sulýlyq pen beıneleýlerdiń qaınar kózi desek, oı men sózdiń zergeri Janat Áskerbekqyzynyń jyrlary osynaý kórkemdik sharttardy minsiz qoldana bilgenin kórýge bolady», dedi Serik Negımov.
Ǵalym Shákir Ibraevtyń aıtýynsha, mıftiń mazmuny qazirgi adam sanasynyń tereń qabattarymen astasyp, áleýmettik astarmen ǵana shektelmeı, adam bolmysynyń qundylyǵyn, rýhanı qyrlaryn da qamtıdy.
«Mıf – jaı qaıtalanatyn daıyn motıv emes. Ol – aqynnyń oıy men sezim dúnıesiniń jańa órisin ashatyn, syrly álemge aınalǵan kúrdeli qubylys. Qazirgi ádebıette mıf fenomenologııalyq turǵydan jańasha transformasııaǵa túsip, adam tanymynyń tereń qatparlaryn aıqyndaıdy. Bul úderis Janat Áskerbekqyzynyń ǵylymı izdenisi men kórkem shyǵarmashylyǵynda aıqyn kórinis tabady», dedi ǵalym.
Konferensııa aıasynda mereıtoı ıesiniń ómirinen syr shertetin beınebaıan usynylyp, «Qumyr-qus úni», «Kórkem mátindegi aktanttyq model» atty qos kitaby tanystyryldy.
Plenarlyq otyrystan keıin is-shara «Qazirgi qazaq poezııasyndaǵy avtorlyq qoltańba: poetıkalyq jáne kórkemdik júıe», «Zamanaýı ádebıettanýdaǵy strýktýralıstik-fenomenologııalyq zertteýler», «Gýmanıtarlyq ǵylymdar toǵysyndaǵy antropologııa jáne mıfologııa», «Fılologııalyq zertteý baǵyttary» taqyrybynda tórt seksııa boıynsha jalǵasty.
Keshki baǵdarlama Astana qalasy ákimdiginiń Mýzykalyq jas kórermen teatry sahnasynda ótken Janat Áskerbekqyzynyń shyǵarmashylyǵyna arnalǵan poetıkalyq-mýzykalyq qoıylymǵa ulasty. Rejısseri – Ashat Maemırov. Aqyn óleńderimen órilgen spektakl poetıkalyq tynyspen tolyǵa tústi. «Ǵajaıyp meken», «Arǵanaty», «Kóktúrkter áýeni», «Tonykóktiń tolǵaýy», «Baba jurtyna oralý»... О́ner men óleń qabysa birigip, tutas týyndyǵa aınalǵan aıshyqty kórinisteı áser etti.
Teatr sahnasynda mereıtoı ıesine arnap óleńin oqyǵan Memlekettik syılyqtyń laýreaty Serik Aqsuńqaruly poetıkalyq qoıylymnyń shyǵarmashylyq mazmuny tereń ekenin atap ótti.
«Poetıkalyq-mýzykalyq qoıylymnyń áseri ǵajap boldy. Janattyń poezııa patshalyǵyna kirip ketip, sodan áli shyǵa almaı otyrmyn. Bul kesh elimizdegi kún saıyn, jyl saıyn ótip jatatyn jıyndardyń eshbirine uqsamaıtyn óner oqıǵasy desek, artyq aıtqanym bolmas. Spektakldiń rejısseri Ashat Maemırovtiń elden erek talanty men izdenisine tántimin», deıdi aqyn.
Budan bólek, teatr sahnasynda aqyn óleńderine jazylǵan «Sen jáne men», «Qara gúl», «Saǵynyp júrmin», basqa da ánderi oryndaldy.
