Sondaı daryny asqan jastardyń biri Qaırat Ábilov edi. 1971 jyly Qostanaı oblysynyń Qamysty aýdanynda dúnıege kelgen ol balaýsa kezinen balýandyq ónerdiń sıqyryna arbalyp, erkin kúreske myqtap den qoıdy. Aýdan ortalyǵynda Ývaıs Dýbaevtyń qol astynda jattyqty. Zerek balanyń boıynda bula kúshtiń bulqynyp jatqanyn baıqaǵan bapkeri ony arnaýly oqý ornyna jiberýdi jón kórdi. Sóıtip, bozbala Qaraǵandy qalasynda qonys tepken áıgili Álııa Moldaǵulova atyndaǵy №3 sport salasyndaǵy Olımpıadalyq mektep-ınternattan bir-aq shyqty.
Talaı daryndy sportshyny shyńdaǵan qarashańyraqta Qaırat óz qatarynyń aldy boldy. 1985–1986 jyldary ózi quralpy balalardyń arasynda Almaty men Arqalyqta ótken respýblıka birinshiliginde qarsylas shaq keltirmedi. 1987 jyly Qaraǵandyda uıymdastyrylǵan mektep oqýshylarynyń spartakıadasynda kúmis medaldy moınyna ilip, Bishkektegi búkilodaqtyq týrnırde top jardy. 1988 jyly Taldyqorǵanda Qazaqstannyń jasóspirimder oıyndarynyń jeńimpazy atanyp, Dýshanbede mektep-ınternattar arasyndaǵy KSRO birinshiliginiń bas júldesin oljalady. 1989 jyly Tbılısıde «A» sanatyndaǵy týrnırde barlyq básekelesinen basym túsip, KSRO-nyń sport sheberiniń kúmis belgisin keýdesine taqty.
Áýeli 69 kg salmaq dárejesinde kúresip, ýaqyt oza 74 kg salmaqqa aýysqan Q.Ábilovtiń jolyna maıtalman mamandar úlken úmitpen qarady. Biraq jalyndy jastyń daryny assa da, baǵy janbady. Túrli jarysta alǵan jaraqattary Qaırattyń keńinen kósilýine múmkindik bermedi. Sodan naǵyz jalyndap turǵan shaǵynda bozkilemmen qosh aıtysty. Alaıda úlken sporttan alystaǵan joq. О́zi bıznespen aınalyssa da, daryndy jastarǵa únemi qamqor qolyn sozyp júrdi, demeýshilik jasady. Qaırat Qubaıulynyń qamqorlyǵyn kórgen talaı jas óren keıinnen el sportyndaǵy eleýli tulǵaǵa aınaldy. О́zekti órter ókinish, Q.Ábilovtiń ómiri tym qysqa boldy, nebári 36 jasynda baqıǵa ozdy. Týǵan aýdanynda jyl saıyn aıtýly azamatty eske alýǵa arnalǵan respýblıkalyq týrnır úzdiksiz ótip turady.
Bul kúnderi Qamystyda sport kesheni salynyp jatyr. Bıyl paıdalanýǵa beriledi dep josparlanyp otyr. О́ńir turǵyndarynyń osy nysanǵa kezinde Qazaqstan men KSRO qurama komandasynyń múshesi bolǵan belgili balýan Qaırat Ábilovtiń esimin berse degen tilegi bar.
