B.Saǵyntaev elimizdiń barlyq óńirinen kelgen kolledjderdiń stýdentterine saıysqa qatysqandary úshin alǵys bildirip, barlyq uıymdastyrýshylardy, demeýshiler men qonaqtardy respýblıkalyq chempıonattyń aıaqtalýymen quttyqtady. Premer-Mınıstr «Atameken» Ulttyq kásipkerler palatasynyń jýyrdaǵy keńeıtilgen otyrysynda bıznes ókilderi shaqyrýdy qabyl alyp, kelesi jyldan bastap WorldSkills Kazakhstan qaýymdastyǵymen bilikti kadrlardy daıarlaý boıynsha belsene jumys isteıtinin habarlady.
WorldSkills Kazakhstan chempıonatynyń basty maqsaty – jumysshy kásipteriniń abyroıyn arttyrý, jas jumyskerlerge qazirgi eńbek naryǵynda suranysqa ıe praktıkalyq daǵdylar men joǵary biliktilikterdi alý múmkindigin berý.
Qazaqstan WorldSkills qozǵalysyna 2014 jyly qosyldy. Qazirdiń ózinde aıtýǵa turarlyq nátıjeler bar. Eger 2015 jyly San-Paoloda ótken WorldSkills Competition birinshi álem chempıonatynda qazaqstandyq komanda 50-orynda bolsa, 2017 jyly Ábý-Dabıde ótken jarysta 24-oryndy ıelendi. Sonymen qosa, elimizde kásiptik-tehnıkalyq jáne joǵary bilimniń damýy bul kórsetkishterdi odan ári jaqsartý úshin perspektıvalar ashyp otyr.
Úzdiksiz oqytý men jańa kásipterdi ıgerý qajettigine erekshe nazar aýdaryldy. Bul jumys úrdisteriniń tehnologııalyq jańarýymen baılanysty. Osyǵan baılanysty, Úkimet jumys berýshilermen, sheteldik sarapshylarmen birlesip qubylmaly eńbek naryǵynda otandyq kadrlardyń básekege qabilettiligin arttyrý úshin kásiptik-tehnıkalyq bilim berý baǵdarlamasyn odan ári jetildirý boıynsha júıeli jumys júrgizip otyr.
Úkimet basshysy birqatar chempıonat qatysýshylarynyń kórnekti jumystaryn aıryqsha atap ótip, jeńimpazdarǵa alty quzyret boıynsha marapattar tapsyrdy. Atap aıtqanda, bızneske arnalǵan IT jobalar (3-oryn – I.Abdýlabaev, 2-oryn – I.Chýprynın, 1-oryn – M.Sokolovskıı); elektronıka (3-oryn – A. Proseskıı, 2-oryn – O.Halımov, 1-oryn – P.Fetısov); veb-dızaın (3-oryn – N.Mıneev, 2-oryn – A.Mýnko, 1-oryn – I.Sımanov); grafıkalyq dızaın (3-oryn – F.Evdokımov, 2-oryn – I.Medhatov, 1-oryn – D.Bolat); kompıýterlik qurylymdaý tehnologııasyn qoldanýmen CAD ınjenerlik grafıkasy (3-oryn – S.Jaılaýov, 2-oryn – O.Shaternıkov,1-oryn – D.Zorın); naýbaıhana isi (3-oryn – I.Borodýlına, 2-oryn – A.Marqabaı, 1-oryn – A.Amanǵosova).
Marapattaý saltanatyna sonymen qatar Parlament Senatynyń depýtaty B. Áıtimova, Parlament Májilisiniń depýtaty J.Nurmanbetova, Premer-mınıstrdiń orynbasary E.Dosaev, Bilim jáne ǵylym mınıstri E.Saǵadıev, Eńbek jáne halyqty áleýmettik qorǵaý mınıstri M.Ábilqasymova jáne basqalary qatysty.
Respýblıkalyq chempıonattyń jeńimpazdary 2019 jyly Qazanda ótetin halyqaralyq chempıonatta Qazaqstan atynan saıysqa túsetin bolady.
Qaraǵandy kólik-tehnologııalyq kolledjiniń oqytýshysy, sarapshy Aqbar Táshen «Jeńil avtomobılder» quzyretinde baıqaýǵa qatysýshylar aýyspaly berilis qorabyn qurastyrǵanyn aıtty. Onyń aıtýynsha, bul óte qıyn. Biraq, qatysýshylar óz isin jaqsy biledi, qazirgi tehnıkalardy jaqsy ıgergen.
«Bul chempıonatty mindetti túrde jalǵastyrý qajet. Jastardyń daǵdylaryn jetildirý úlken jumys. Chempıonatta ótken tórt jyldan beri asa aýqymdy jumys atqarylǵan. Biz joǵary nátıjelerge qol jetkizdik, biraq áli de sheberlikti shyńdaý qajet. Basqa elderdiń, Azııa jáne Eýropa elderiniń tájirıbesinen úırený kerek, dedi A.Táshen.
Almaty qalasynan kelgen tehnıkalyq delegat Qýatbek Ábildınov qazaqstandyq chempıonattyń eýropalyq standarttar deńgeıinde ótkenin atap ótti.
«Bul baıqaýda biz tehnıkalyq máselelerdi: rásimderdiń saqtalýyn, sarapshylar jumysyn, alańdaǵy jumysty uıymdastyrýmen aınalystyq. Bizdiń pikirimizshe, chempıonat óte joǵary deńgeıde ótti. Qatysýshylarǵa halyqaralyq standarttar boıynsha talaptar qoıyldy. Baǵdarlama, sondaı-aq Eýropa chempıonaty pen Ábý-Dabıde ótken álem chempıonatyna saı keldi. Tapsyrmalardyń bir bóligi TMD chempıonatynyń tapsyrmalaryna uqsas boldy. Álem chempıonattarynyń tájirıbesinde tehnıkalyq quzyretter boıynsha tapsyrmalardyń tolyq oryndalýy sırek kezdesedi. Sebebi, olar kúrdeli. Bizdiń chempıonatta kóptegen qatysýshylar óz tapsyrmalaryn tolyq aıaqtaı alǵanyna tańǵaldym. Bul tusta qatysýshylardyń óńirlerde psıhologııalyq daıyndyqtan ótýi úlken ról oınady dep oılaımyn», dedi Q.Ábildınov.
Tóreshi, Túrkistan oblysynan kelgen tehnıkalyq delegat Aıdos Appazov Qazaqstanda kásiptik-tehnıkalyq bilim berý deńgeıi kóterilip kele jatqanyn aıtty.
«WorldSkills Kazakhstan jobasy Qazaqstannyń kásiptik-tehnıkalyq biliminiń ımıdjin kóterýge baǵyttalǵan. Men eki quzyretke tóreshi boldym: mehatronıka jáne elektromontaj. «Elektromontaj» quziretinde qatysýshylar kóp boldy da, bizge tórelik etý biraz qıynǵa tústi. Sonymen qatar elektromontajda prıbordyń jumysyn retteıtin usaq bólshekter óte kóp. Biraq balalar ony da ıgerdi. «Mehatronıka» quzyretinde qatysýshylar kompıýterlik qurylǵynyń kómegimen jumys isteıtin tutas stansa quraýy tıis edi. Bul asa qyzyqty boldy. Kásiptik-tehnıkalyq bilim deńgeıi kóterilip keledi, jabdyqtar da zamanǵa saı, balalar halyqaralyq standarttarǵa sáıkes daıyndalǵan», deıdi A.Appazov.
Sarapshy, Kentaý polıtehnıkalyq kolledjiniń arnaıy pánder boıynsha oqytýshysy Nurjan Syzdyqov memleket tarapynan tehnıkalyq mamandyqtarǵa túsip jatqan stýdentterge kórsetilip otyrǵan qoldaýdyń mańyzdylyǵyn atap ótti.
«Elektromontaj, elektronıka jáne robottehnıka modýlderi boıynsha stýdentterdi daıarlaý kezinde jaýapkershilik seziledi, sebebi stýdentterge álemdik standarttardyń talaptaryna saı bilim berý kerek. Biz halyqaralyq standarttardy ustanýǵa tyrysamyz. Búginde stýdentterdiń deńgeıi birshama kóterilip keledi, al oqýdy bitirgen soń olar óz isiniń naǵyz sheberi bolady. WorldSkills Kazakhstan stýdentter úshin óz bilimderin tekserýdiń eń joǵarǵy deńgeıi. Oqytý kezinde olarmen birge biz de úırenemiz. Bizde dýaldy oqytý júıesi bar, stýdentterdiń 60%-dan astamy zaýyttar men ónerkásiptik kásiporyndarda taǵylymdamadan ótedi, demek, óz daǵdylaryn edáýir arttyrady. Bizdiń stýdentter 3 kýrsta oqı júrip jumys isteı bastaıdy. Búginde ınjenerlik mamandyqtardyń mártebesi aıtarlyqtaı joǵary kóterilgenin aıtýǵa bolady, stýdentterdiń basym bóligi osyndaı kásipterdi tańdaýda. Sebebi elimizde oǵan suranys bar, ózektiligi sezilýde, memlekettiń qoldaýy da zor, jalaqysy da burynǵydan joǵarylady», dedi N.Syzdyqov.
Suńǵat ÁLIPBAI,
«Egemen Qazaqstan»
