Sharaǵa teleradıokorporasııanyń Basqarma tóraǵasy Erlan Qarın qatystyp, «Qazaqstan», «Qazsport» jáne «Balapan» telearnalarynyń Táýelsizdik merekesine oraı efırge shyǵatyn arnaıy jobalary týraly aıtty.
Basqarma tóraǵasy Erlan Qarınniń aıtýynsha: ««Qazaqstan» korporasııasynyń quramyna kiretin telearnalar men radıolardyń, onyń ishinde Ulttyq arnanyń eń basty maqsaty - ulttyq ónerdi, ulttyq qundylyqtardy nasıhattaý. Elimizdiń basty meıramy - Táýelsizdik kúnine biz erekshe mán beremiz. О́tken jyly habarlaǵandaı, bizder jyl basynda, eń basty jobalarymyzdyń tusaýkeserlerin arnaıy Táýelsizdik kúnine josparlaǵan bolatynbyz. Sondyqtan, aqparat quraldary arqyly, bizdiń televızııalyq ónimder arqyly, halyq arasynda Táýelsizdik kúni merekesiniń mańyzdylyǵyn arttyrýǵa umtylamyz. Táýelsizdik kúnine oraı, osy aptada bolatyn arnaıy jobalardyń baǵdarlamalyq kestesin aldyn-ala talqyladyq. Sebebi, bul bizdiń eń úlken, tól merekemiz. Osy mereke kúnderi aýdıtorııamyzdyń keń jınalatynyn eskere otyryp, tanymdy, tárbıelik mańyzy zor jobalarymyzdy daıyndap, usynatyn bolamyz. Bıyl, korporasııaǵa kiretin barlyq qurylymdarymyz osy Táýelsizdik kúnine arnaıy daıyndaldy. Ulttyq arna «Keıki mergen» jáne «Kúı ǵumyr» atty tarıhı telehıkaıalardyń tusaýkserlerin osy merekege arnaıy josparlanǵan bolatyn. «Balapan» arnasynyń kishkentaı kórermenderi búginnen bastap HD formatta 3 jańa mýlthıkaıany tamashalaı alady: «Aıdar», «Dala oıyndary», «Ertemir». Qazaq anımasııasy arqyly ózimizdiń ulttyq keıipkerimizdi jasap shyǵarýymyz qajet».
15 jeltoqsannan bastap, «Qazaqstan» Ulttyq arnasynda 14:50-de 16 bólimdi «Keıki mergen», al, 17 jeltoqsan kúni, saǵat 21:50-de kúı óneri, qazaqtyń jany – dombyrany arqaý etken «Kúı ǵumyr» telehıkaıasy. 16 jeltoqsanda, saǵat 21:00-de «Men qazaqpyn» gala-konsertiniń tusaýkeseri. Gala-konsertte «Men qazaqpyn» jobasynyń jeńimpazdaryn terme, kúı jáne án janrlary boıynsha marapattap, qazylar alqasynyń músheleri Uljan Baıbosynova, Aıgúl Úlkenbaeva, Aıgúl Elshibaeva óz ónerlerin kórsetedi.
15 jeltoqsan kúni, Táýelsizdik kúnine oraı, saǵat 18:20-da «Jeltoqsannyń 16 kúni» atty derekti fılmi kórsetiledi. Sondaı-aq, Táýelsizdik jyldaryndaǵy elimizdiń eleýli oqıǵalary men jetistikteri, QR Prezıdentiniń atqarǵan jumystary baıandalatyn «Qazaqstan» telearnasy jáne "Igraphic" dızaın stýdııasy birlese otyryp daıyndaǵan beınerolıkter toptamasy usynylatyn bolady.
Sonymen qatar Ulttyq arna kórermenderi ádettegideı «Umytylmas ánder» konsertin, «Ázil álemi» oıyn-saýyqtyq baǵdarlamasynyń jańa shyǵarylymyn kóre alady.
Al «Qazsport» arnasynda 16 jeltoqsan kúni, saǵat 10:10-da «Anatolıı Hrapatyı: Moıa rodnaıa shtanga» atty derekti fılmi, 19:35-te «Qazaqstan FIGHTER» realıtı-shoýynyń fınaldyq kórsetilimi, 23:00-de «Astana arlans» kýbogyna arnalǵan kásibı boks keshi kórermenge jol tartady.
«Balapan» arnasy 10-shy jeltoqsannan bastap kishkentaı kórermenderge HD formatta 3 jańa mýlthıkaıa tartý etpek. Dúısenbiden bastap 12:35-te «Aıdar», 12:45-te «Dala oıyndary», 16:30-da «Ertemir» anımasııalyq fılmderi efırge jol tartady. Sonymen qatar, «Balapan» arnasynyń kórermenderi «Orman kúzeti» men «Shahmat patshalyǵy» mýlthıhaıalaryn tamashalaı alady.
