«Ǵafý aqynnyń týǵanyna 90 jyl tolýyna arnalǵan úlken shara Astanada ótti. Týǵan jeri de qarap otyrǵan joq. Aqynnyń kindik qany tamǵan Torǵaı óńiri men Qostanaıdyń barlyq aýdandary men qalalaryndaǵy kitaphanalar men mektepterde, kolledjderde aqynnyń mereıtoıyna oraı sharalar keńinen ótti. Búgingi kesh sol sharalardyń qorytyndysy bolyp otyr. Bıyl Mádenıet mınıstrliginiń qoldaýymen aqyn shyǵarmalarynyń 3 tomdyǵy jaryq kórdi. Biz aqynnyń uly Baqyt aǵamyzdyń ótinishimen ol kitaptardy oblystyq ámbebap kitaphanaǵa ákelip tapsyrdyq. Endi onymen qostanaılyq oqyrmandar da tanysa alady.» dedi Erlan Bolatuly. Odan keıin О́.Sultanǵazın atyndaǵy Qostanaı pedagogıka ýnıversıteti Fılologııa fakýltetiniń dekany Kenjegúl Esirkepova Ǵafý Qaıyrbekovtiń shyǵarmashylyǵy týraly baıandama jasady. Ǵafýdyń kózin kórgen, janynda júrgen qostanaılyq rýhanı inileri Ǵumar Ahmetchın, Naǵashybaı Muqatov estelikter aıtty.
«Ǵafańnyń óleńine jazylǵan Shámshiniń «Ana týraly jyr» ánin túrki tildes halyqtar óz ánindeı shyrqaıdy. Men Ýfaǵa qudalyqqa barǵanda osy ándi aıtamyz ǵoı dep daıyndalyp barsaq, tatar qudalar bizden buryn aıtyp qoıǵany bar. Olar ándi tatar tilinde aıtty, biz sosyn qazaq tilinde shyrqap berdik. Sóıtsek, tatarlar «qazaqtar óz ánderińdi aıtyńdar, bul bizdiń án» dep «qyzǵanyshtyq» kórsetti. Sodan men qaltamdaǵy án jınaǵyn kórsetip, talasqanym bar» dep qyzyqty estelik aıtty jazýshy Ǵumar Ahmetchın.
«Ǵafańnyń óleńderi keń taraldy. Onyń shyǵarmalarynyń arasynda týǵan jer týraly asqaq únmen jazylǵan, patrıottyq sezimge toly ári názik lırıkalary bir tóbe. Ánge aınalyp ketken óleńderi qanshama! Ǵafýdyń keremet ánshiligi de bolǵan. Qazir Qostanaıdaǵy eń uzyn kóshe, onyń boıyndaǵy qazaq orta mektebi aqynnyń atynda. Bul týǵan jerdiń aqyn ulyna degen qurmeti» dedi keshti júrgizgen aqyn Aqylbek Shaıahmet.
Keshti mektep oqýshylary men О́.Sultanǵazın atyndaǵy Qostanaı pedagogıka ýnıversıtetiniń stýdentteri Ǵafýdyń óleńderimen, E.О́mirzaqov atyndaǵy oblystyq fılarmonııanyń ánshileri aqynnyń sózine jazylǵan ándermen kórkemdep otyrdy.
Názıra JÁRIMBET,
«Egemen Qazaqstan»
Qostanaı
