Egemendik jolynda aıryqsha erlik kórsetken ór rýhty babalardyń bolmysyn búginge jetkizip, solardyń abyroıly isin jalǵastyra bilgen Elbasynyń da eren eńbegin aıta ketkenimiz jón. Táýelsizdik kúni – eń qasıetti kúnderimizdiń biri. Ol qoǵamdyq sananyń úlken silkinisinen, qazaq jurty táýelsizdikten úmit úze bastaǵan shaqta keldi. Sonysymen de qymbat, sonysymen de qasterli, aıaýly.
Qazirgi meniń zamandastarym, ádebıettegi, saıasattaǵy barlyq qatarlastarym egemendiktiń qazyǵyn qaǵýǵa, býynyn bekitýge, rámizin ázirleýge ar-ujdandarymen qyzmet etti. Tikeleı atsalysty. Saıası, ádebı elıtanyń halyqtyń rýhyn kóterýdegi oryndary aıryqsha. Al halyqtyń eńbegi – durys tirshilik etýlerinde. Saıasattaǵy búgingi úlken býynnyń táýelsiz Qazaqstannyń alǵashqy táı-táı basqan ýaqytynda istegen jumystaryn, qajyrly eńbekterin joǵary baǵalaımyn, qurmetteımin.
Egemendikke jetýdiń qııan keski joly, taýqymetti tarıhy bar. Jazylǵany, jazylmaǵany bar. Ol óz aldyna dańǵaıyr taqyryp. Al sol táýelsizdikti saqtaı otyryp, Máńgilik Elge aınalý da búgingi aıqyn maqsatymyz. Damyǵan elderdiń qataryna kirý úshin tek ekonomıka emes, rýhanııat ta qajet. Ekonomıkań damyp, rýhanııatyń oısyrap tursa, eshqandaı damyǵan eldiń qataryna kire almaısyń. Elbasynyń «Rýhanı jańǵyrý» baǵdarlamasy mine osyny kózdeıdi. Keshe ǵana jaryq kórgen «Uly dalanyń jeti qyry» eńbegi de sondaı tereń tolǵanystan, úlken sezinisten týǵan maqala. Ár qazaqtyń kókeıinde ózi oryndaıtyn mıssııasy bolýy kerek. Árkim ynta-shyntasymen háli jetkenshe ekonomıkaǵa, ádebıetke, mádenıetke úles qosýy tıis. Sonda ǵana alǵa ozamyz.
Halyqtyń júregi, oıy, sanasy egemendikpen birge oıanǵan. Árıne áli de ulttyq sana tolyq oıana qoıǵan joq. Biraq osy umtylys tolastamaýy kerek. Elbasynyń «Uly dalanyń jeti qyry» degen úlken eńbegi osy jolda da zor serpilis boldy. Jerdiń, eldiń tarıhy áli de tereń zerdeleýdi qajet etedi. Elbasynyń jasap berip otyrǵan baǵdarlamalary arqyly sol olqylyqtyń bárin toltyrýymyz kerek. Al sol eńbektiń bári de táýelsizdik úshin ekenin bir sát esten shyǵara almaımyz.
Táýelsizdigimiz baıandy bolǵaı.
Ánes Saraı,
jazýshy, Memlekettik syılyqtyń laýreaty
