Syrtqy kórinisi de ashyq boıaýly, adamǵa qýanysh syılaıtyn 9 qabatty turǵyn úı «Nurly jer» baǵdarlamasy aıasynda salynyp, shahardaǵy baspana kezeginde turǵan otbasylarǵa – kóp balaly, jalǵyzbasty, az qamtylǵan t.b. sııaqty 13 kategorııa ıelerine berildi. Bul – Oral qalasynyń Murat Móńkeuly kóshesi boıynda osy jeltoqsan aıynyń ishinde tapsyrylǵan ekinshi toǵyzqabatty úı.
- Esterińizde bolar, osydan 6-7 jyl buryn dál osy ara – mań dala edi ǵoı. Búginde bul jerge kishigirim qala ornaǵan: 50-den asa kópqabatty úı, emhana, eki mektep, balabaqsha, sport kesheni bar. Osynyń bárin memleket sizder úshin jasap otyr. Qazaqstanmen birge qalamyz ósip, oblysymyz órkendep keledi. Jastar bilim alyp, jumysqa ornalasyp, kásipkerler óndirisin damytyp, barlyǵyna jaǵdaı jasalyp jatyr. Turǵynúı kezeginde turǵan ózge de qala turǵyndaryna da úı beriledi. Bizde memleket mindetine alǵan, Elbasy aıtqan joba-jospardyń barlyǵy da júzege asady. Sizderge Elbasynyń atynan jańa páterdiń kiltin usyna otyryp, Táýelsizdik merekesimen shyn júrekten quttyqtaımyn, - dedi óz sózinde Batys Qazaqstan oblysynyń ákimi Altaı Kólginov páter kiltin jańa ıelerine saltanatty jaǵdaıda tapsyryp turyp.
Jalpy, Batys Qazaqstan oblysynda sońǵy jyldary turǵyn úı qurylysy jandanyp keledi. Bıyl «Nurly jer» baǵdarlamasy aıasynda Aq Jaıyq óńire 17,2 mlrd teńge qarjy bólingen.
- Bıyl oblys ortalyǵynda 26 kópqabatty turǵyn úıdiń, aýdandarda 103 úıdiń qurylysy júrýde. Bul degen myńdaǵan adam baspanaǵa qol jetkizedi degen sóz. Jyl sońyna deıin taǵy eki úıdiń – Qurmanǵazy jáne Gagarın kóshesinde apat jaǵdaıyna baılanysty qıratylǵan úıdiń ornyna kóterilgen jańa úılerdiń qurylysy aıaqtalady, - deıdi Batys Qazaqstan oblystyq qurylys basqarmasynyń basshysy Altynbek Qaısaǵalıev.
Al «Sarytaý» shaǵynaýdanynda «Nurly jol» baǵdarlamasy aıasynda tapsyrylǵan 900 oryndyq №50 jańa mektep ǵımaratynyń ashylýyn turǵyndar kópten kútken edi. О́ıtkeni osy aýdanda ornalasqan №10 jáne №47 mektepterde oqýshy tym kóbeıip, úsh aýysymda oqýǵa májbúr bolǵan. Al Elbasy bıylǵy Joldaýynda bilim berý salasyna da erekshe ekpin berip, úsh aýysymdyq mektepterdi azaıtýdy júktegen edi.
- Sarytaý shaǵynaýdanynda 900 oryndyq №50 mektep ashylǵanda buǵan deıin úsh kezekte oqyp kelgen №47 jáne №10 mektepter edáýir jeńildeıtin bolady. Endi olarda úsh aýysym bolmaıdy. Jańa mektepte eki aýysymda 1900 oqýshy oqıtyn bolady. Biz endi apattyq jaǵdaıdaǵy mektepterge kóńil bólemiz. Bilim jáne ǵylym mınıstrligimen kelisip, kelisim aldyq, bıýdjetin bekittik, kóktem shyǵa Aqjaıyq aýdanynyń ortalyǵynda 300 oryndyq mektep ǵımaraty ınternatymen, al, Qaztalovta Alma Orazbaeva atyndaǵy mekteptiń ornyna 600 oryndyq mektep salynady. Dál osy aýdanda №51 mekteptiń qurylysyn bastaımyz, - dedi óńir basshysy Altaı Kólginov.
Mektep kesheni toǵyz bloktan turady. Munda 12 oqý synyby, 9 ámbebap bólme, eki sport zal, 294 oryndyq májilis zaly, 156 orynǵa arnalǵan ashana, eńbek sabaqtaryna arnalǵan birneshe sheberhana bar. Alty mýltımedııalyq, tórt ınformatıka kabıneti jumys isteıdi. Geografııa, bıologııa kabınetteri zerthanalarymen jabdyqtalǵan.
Qazbek QUTTYMURATULY,
«Egemen Qazaqstan»
Batys Qazaqstan
