Eski Iqan aýyldyq okrýginde 2 qabatty 10 páterli qyzmettik turǵyn úı, Shaǵa aýyldyq okrýgine qarasty Yntymaq aýylynda da 10 páterli 2 turǵyn úıdiń kilti jas mamandarǵa tabys etildi. Olar baspanaǵa bilikti kadrlardy aýyldarǵa tartý maqsatynda qolǵa alynǵan baǵdarlama aıasynda qol jetkizip otyr. Mereıli merekede baspanaly bolǵandardyń ishinde muǵalimder men dárigerler, jáne quqyq qorǵaý salasynyń ókilderi bar.
Túrkistan oblysynyń ákimi Janseıit Túımebaev jas mamandarǵa páter kiltterin tabystap, quttyqtady. «Memleket basshysynyń halyqty baspanamen, jumyspen qamtýǵa arnalǵan baǵdarlamalarynyń nátıjesinde qanshama otbasy baspanaly bolyp, jumysqa ornalasýda. Búgin mine Táýelsizdigimizdiń 27 jyldyǵy qarsańynda Kentaý qalasyna qarasty Eski Iqan men Yntymaq aýylynda jas mamandarymyzǵa 30 páter berilip jatyr. Endeshe eńbekterińizge bereke, jańa baspanalaryńyzǵa qut darysyn», - dedi Janseıit Qanseıituly.
Aıta ketelik, aýyldarǵa qajetti mamandardy kóptep tartý úshin qabyldanǵan baǵdarlama boıynsha oblysta 330 páterli 33 úıdiń qurylysy bastalǵan bolatyn. Táýelsizdik merekesine oraı solardyń alǵashqylary paıdalanýǵa berilip otyr.
Al Arys qalasynyń «Kóktem-2» turǵyn aýdanynda 36 páterlik úsh birdeı kópqabatty úı baspana kezeginde turǵan azamattarǵa berildi. Saltanatty sharada oblys ákiminiń orynbasary T.Sársembaev turǵyndardy merekemen quttyqtap, 108 páterdiń kiltin qýanysh ıelerine tabys etti. Sondaı-aq, merekege oraı atalǵan móltek aýdannyń mańynda jańa sport alańshasy el ıgiligine berildi. Smetalyq quny 60 mln. teńge bolatyn alańshanyń qurylys jumystaryn «Samuryq – Qazyna Trans» AQ-nyń tapsyrysymen merdiger «Master – Qazstroı» JShS júrgizgen. Jalpy Arys qalasynda merekege oraı 16 nysan el ıgiligine berildi.
Ǵalymjan ELShIBAI,
«Egemen Qazaqstan»
Túrkistan oblysy
