16 jeltoqsan qarsańynda oblysta jańa nysandar qoldanysqa berilip, turǵyndarǵa baspana kilti tapsyryldy. Sondaı-aq, osy kúni elimizdi damytýǵa qosqan úlesi úshin birqatar azamattar memlekettik marapattarǵa ıe boldy.
Taldyqorǵan qalasyndaǵy oblystyq kóp salaly balalar aýrýhanasynyń janyna ashylǵan Neonataldy hırýrgııa ortalyǵy jumysyn bastady. Jańadan ashylǵan neonataldy hırýrgııalyq ortalyq 60 tósekke shaqtalǵan. Reanımasııalyq bólimde 9 tósek qoıylǵan. Ortalyq jańa ozyq úlgidegi quraldarmen jabdyqtalǵan. Atap aıtqanda, laparoskopııalyq baǵan, beınekolonoskop, fıbrogastroskop, bronhoskop, narkozdyq apparattar, IVL, jańa týǵan nárestege arnalǵan «Jıraf» reanımasııalyq ústeli, fototerapııa apparattary, kıývezder, reanımasııalyq tósek-oryndary bar.
Sondaı-aq, mereke qarsańynda oblys ortalyǵynyń Ońtústik-Batys aýdanynda 64 páterli jalgerlik turǵyn úı paıdalanýǵa berildi. Kópten kútken páterlerdiń kiltin ıelerine oblys ákimi Amandyq Batalov tapsyrdy. Jańa baspanaǵa ıe bolǵandar qatarynda múmkindigi shekteýli jandar, jetim balalar, kóp balaly, tolyq emes otbasylar jáne basqa da baspana kezeginde turǵan adamdar bar.
- Elbasy halyqty qoljetimdi baspanamen qamtýǵa erekshe mán berip otyr. Osyǵan baılanysty «Nurly jer», «7-20-25» jáne basqa da tıimdi baǵdarlamalar qabyldandy. Oblys boıynsha bıylǵy jyly 706 myń sharshy metr turǵyn úı, al «Nurly jer» baǵdarlamasy boıynsha jalpy alańy 34,3 myń ga bolatyn 72 turǵyn úı nemese 468 páter halyq ıgiligine berildi. Solardyń biri - búgin sizderge usynylyp otyrǵan úı, - dedi páter ıelerinń qýanysh bólisken aımaq basshysy Amandyq Batalov.
Jalpy, Táýelsizdik kúnine oraı Almaty oblysynyń birneshe aýdanynda turǵyndar qonys toıyn toılady. Máselen, Qapshaǵaı qalasynda 50 páterli, Alakól aýdanynyń Úsharal qalasynda 60 páterli, Kóksý aýdanynyń Balpyq bı aýylynda 20 páterli jalgerlik jáne nesıelik turǵyn úıler esik ashty.
Qalmahanbet MUQAMETQALI,
«Egemen Qazaqstan»
Almaty oblysy
