– Esimiń júrekti tolqytatyn qudiretti eken! – dedik kórgen betten uzyn boıly, ádemishe kelgen jigitke. – Bir ǵana Qazaqstan bar ma desek, ekinshi Qazaqstan Maıqaıyńda júr eken ǵoı! – dep qýana tańdanyp, tanysyp ta jatyrmyz.
– Iá, atym – Qazaqstan! Men 1994 jyly 17 aqpanda Baıanaýyl aýdanynyń Jańajol aýylynda dúnıege keldim, – dedi.
– Erekshe esimińdi kim qoıǵan?
– Atamekenine asyǵyp jetken qazaqtyń bir ulymyn ǵoı. Alysta júrgen qazaq úshin týǵan el, azamattyǵyn alǵan týǵan Otannan artyq eshteńe joq qoı! – dep tolqı sóıledi Qazaqstan.
Iá, 1991 jyly elimiz egemendigin alǵan alǵashqy kúnderi-aq atamekenge qaraı at basyn burǵan kósh bastaldy. Osy jyly Mońǵolııanyń Baıanólgeı aımaǵynda turǵan Qýantaı Qumarhan men Zoıa Sharı de uldary Baqtııar, Murat, qyzdary Mereke, Saırangúl, Suńqary bar 5 balasyn jetelep elge oralǵan eken.
– Shettegi qazaq atajurtqa elim, jerim dep jetti. Nursultan Nazarbaevqa búkil ǵumyrynda yrza. Meniń de yrzalyǵym, júrek tebirentken qýanyshym osy. Sóıtip, atamekende týǵan ulyma Qazaqstan degen esim berdim, – deıdi Qýantaı aǵamyz.
Qýantaı aǵanyń úıiniń ózi tarıhı mýzeı ispettes eken. Jarqyraǵan dúnıeden buryn uly batyr-jyraýlardyń sýretteri, týlary, aınala oıý-órnek, ulttyq salt-dástúrge saı buıymdar, shejire men ótkenimiz týraly jazylǵan kitaptarǵa toly.
– Elge kelgen soń «Shejire-estelik» jazdym, qyzym. Árıne, bala kezden ósken Qobda ózeni, Tulba kóli, Bóken, Saıyr taýlary, Qońyróleń, Borty, Qarasaı, Dórekól, Qatý, Burǵysty, Qarabasty, Qyzylbasty, Dabaty sııaqty ólkelerdiń sońymyzda qalǵany elestep eleńdetetini de bar. Biraq, ata-babanyń jerinen qymbat ne bar?! – dep syrtynda kógildir taýlary kóline shomylǵan sýreti bar kitapty bizge usyndy.
Keıin Qýantaı aǵamyzdyń otbasy Baıanaýyldyń Jańajol aýylynan 1996 jyly Maıqaıyń kentine kóship keledi.
Al biz áńgimelep otyrǵan Qazaqstan Qýantaıuly baýyrymyz atalǵan kenttegi mektepte oqyp, bilim alady.
– Mektepti bitirgen soń, Astanadaǵy «Qazaqstan temir joly» AQ-ǵa qarasty temirjol kolledjine oqýǵa túsip, teplovoz mashınısi mamandyǵyn alyp shyqtym. Áke jolyn qýdym desem de bolady, óıtkeni ol kisiniń kásibı mamandyǵy mehanık. Mońǵolııada júrgizýshi, avtotehnık mamandyǵyn, jol, qurylys salalaryn jete meńgergen. Bizdiń kentimiz óndiristik kent sanalady, aınalasynda úlkendi-kishili kásiporyndar az emes. Jastarǵa jumys bar, – deıdi Qazaqstan.
Al anasy Zoıa «Kúmis alqa» ıegeri. Aǵamyz kenttegi jergilikti qoǵamdastyq keńes múshesi. Bul kúnderi kentte úsh myńǵa jýyq atajurtqa oralǵan aǵaıyndar otbasy turyp jatyr. Zoıa apamyz ben Qýantaı aǵamyz ekeýi ul-qyzdarynan Aızada, Dastan, Dilnáz, Samal, Saýran, Áıkerim, Aızere, Aıan, Aldııar, Jasmın atty nemereler ósirip, qyzyǵyn kórip otyr.
– Ulymyz Qazaqstannyń da endi úılenip, otbasyn qurýyn kútýdemiz. Sol jaqsy kúnge, toıǵa jetkizsin. Nemerelerimizdiń de uly atamekenderinde týyp-óskenderine táýbe! – deıdi Zoıa apamyz.
– Árıne, ata-anama jaqsy kelin ákelemin degen oıym bar. Egemen elimizdiń irgesi berik, kók týy jarqyraı bersin! Búkil bir eldiń esimin alyp júrgen men de eldiktiń, egemendiktiń egesi bolýǵa daıynmyn! – dep tilek qosty Qazaqstan.
Farıda BYQAI,
«Egemen Qazaqstan»
Pavlodar oblysy,
Baıanaýyl aýdany,
Maıqaıyń kenti
