– Tuńǵysh qyzymnyń týǵan kúnin otbasymyzben asyǵa kútip júrgenbiz. Nuraıdyń túrli jospary boldy. Qurbylaryn úıge shaqyryp, dastarqan jaımaq nıetin de bildirgen. Biraq eki apta buryn: «Áke, men týǵan kúnimdi atap ótpeıtin boldym» degende, «bireý renjitti me?» dep shoshyp kettim, – deıdi Nuraıdyń ákesi Abzal Temirǵalıuly.
Biraq Nuraıdyń josparyn ózgertken ózge emes, óz júregi eken.
– Osydan birer jyl buryn ákem «Qustar – bizdiń dosymyz» degen keremet kitap alyp bergen edi. Avtory – aqyn Esenǵalı Raýshanov. Osy kitaptan qustar týraly nebir qyzyqty málimetter oqydym. Osylaısha qanatty dostarymyzdy erekshe jaqsy kórip kettim. Olarǵa kómektesý týraly árdaıym oılap júretinmin. Týǵan kúnim jaqyndaǵan saıyn «jyl saıyn jurtpen birdeı atap óte bergenshe, eshkimge uqsamaıtyndaı etip atap ótsem» degen oı keldi, – deıdi Nuraı.
Kúndelikti ómirde baıqaı bermeımiz, qys kezinde qustar, ásirese kishkene boztorǵaı, shymshyqtar ashtyq pen sýyqtan qatty qınalady eken. Nuraı ǵalamtor aqtaryp, qustarǵa qalaı kómektesý kerek degen aqparatty súzip shyqqan. Sóıtip kishkentaı torǵaılardy qysta jeldiń yzǵarynan qorǵap pana bolatyn ári adamdar jem salýǵa yńǵaıly uıashyqtar jasatý kerek degen sheshimge kelgen.
– Qyzymnyń bul oıyn birden qoldadyq. Ishimnen qatty qýandym. Qala bazarynda besik, ulttyq ústel, t.b. jasaıtyn sheberge jolyǵyp, birden 17 uıashyqqa tapsyrys berdik, – deıdi Abzal.
– Qolónermen kópten aınalysyp júrmin ǵoı. Buǵan deıin qaratorǵaıdyń uıasyn jasap berýdi surap, birli-jarym orys qarttary keletin. Olar uıany kóbine óz saıajaıyna ornatady. Biraq jastardyń birden dál munsha kóp uıa jasatqanyna birinshi ret kezdesip otyrmyn, – dep tańǵalady sheber Nurdildá Álseýov.
Nurdildá sheber qys kezinde qustarǵa jem salatyn 10 saýyt pen sýyqtan panalaıtyn 7 uıany jasaýǵa bar ónerin salypty. Qazaqy oıý-órnekpen jasalǵan bul uıada bári eskerilgen.
– Shatyr erneýi tómen bolǵandyqtan buǵan qarǵa, kepter sııaqty úlken qus kire almaıdy. Qys kezinde eń álsiz, panasyz qalatyn boztorǵaı men shymshyq qoı. Sondyqtan jemsaýyttardy osy kishkene qustarǵa arnap jasadyq, – deıdi Nurdildá Aıdildáuly. Sheber tipti bul iske ynty-shyntysymen kirisip ketipti. Tapsyrys ıeleri tek uıa jasaýdy ótinse, ony Oral qalalyq saıabaǵyna ornalastyrýǵa Nurdildá ózi suranyp kelipti.
– Qazaq jastarynyń osyndaı áleýmettik bastama kóterip, kópke úlgi bolyp jatqanyna qatty qýandym, – deıdi ol.
Týǵan kúninde qanatty dostaryna meıram jasap, júrek meıirimin shashqan Nuraı boıjetkenniń osy úlgisi ózge qurbylaryna da juǵysty bolsyn dep tiledik.
Qazbek QUTTYMURATULY,
«Egemen Qazaqstan»
Batys Qazaqstan oblysy
