Qazaqstan Respýblıkasynyń eńbek sińirgen sport qaıratkeri Marat Jarmaǵambetov 2005 jyldan beri Aqkól aýylynyń jasóspirimderin erkin kúreske baýlyp júr. Onyń shákirtteri talaı mártebeli jarystarda jeńistiń bıik tuǵyrynan kórinýde. Aqkól aýylynyń aýmaǵynda jerlengen qazaqtyń sońǵy handarynyń biri Ýálı han atamyzdyń arýaǵyn asqaqtatý nıetinde ashyq týrnır tuńǵysh ret jalaýyn kóterdi. Bul rýhanı jańǵyrýymyzdyń jarqyn bir kórinisi ispetti.
– Bul týrnırdi Aqkól aýylynda bapkerlik qyzmette júrgen Nurbek Karjanov pen Marat Raqymjanov uıymdastyrdy. Olardyń maqsaty balýandardyń deńgeıin kóterý,–deıdi bas tóreshi Marat Jarmaǵambetov.
Orta mekteptiń sport zalyna tóselgen bozkilemde 60 astam jasóspirim balýan beldesti. Tuńǵysh týrnır óte tartysty ótti. Aqkól orta mektebiniń oqýshylary Mahat Hamıt, Almaz Ábýov, Erseıit Ábilqasymov jáne Arýlan Muhamedáli jerlesteriniń aldynda jaqsy óner kórsetip, Ýálı han atyndaǵy tuńǵysh týrnırdiń chempıondary atandy.
Baıqal BAIÁDIL,
«Egemen Qazaqstan»
Aqmola oblysy.
