Májilis depýtattary «Qazaqstan Respýblıkasynyń keıbir zańnamalyq aktilerine menshik quqyǵyn qorǵaýdy kúsheıtý, tórelik, sot júktemesin ońtaılandyrý jáne qylmystyq zańnamany odan ári izgilendirý máseleleri boıynsha ózgerister men tolyqtyrýlar engizý týraly» Qazaqstan Respýblıkasy Zańynyń jekelegen tarmaqtarynda Memleket basshysynyń azamattardyń múliktik quqyqtaryn qorǵaýdy kúsheıtý jónindegi qarsylyqtarymen kelisti.
Sonymen qatar jalpy otyrysta Qazaqstan Respýblıkasynyń zańnamalyq aktilerine bıznes-ortany damytý jáne saýda qyzmetin retteý máseleleri boıynsha zańnamalyq túzetýler II oqylymda maquldandy.
Zań jobasynyń mańyzdylyǵyna toqtalǵan Nurlan Nyǵmatýlın bul qujat Memleket basshysynyń bıznes-ortany odan ári damytý jónindegi tapsyrmasyn iske asyrý maqsatynda ázirlengenin atap ótti.
Palata Spıkeriniń pikirinshe, búgin qabyldanǵan túzetýler kásipkerlikti qoldaýdyń tıimdi tetigin qurýǵa múmkindik beredi. О́ıtkeni, bul, eń aldymen, jańa kásiporyndar ashý, nesıe alý, qurylysqa ruqsat berý jáne salyq salýǵa jaǵdaı jasaıdy.
Bul jolda búgingi engizilip otyrǵan ózgerister bıznes salasyn damytýǵa, saýda qyzmetin nyǵaıtýǵa erekshe yqpal etetin bolady. Sonymen birge kásipkerler úshin de óte tıimdi. Osynyń barlyǵy shaǵyn jáne orta bıznestiń ekonomıkalyq qýatyn kúsheıtýge serpin beretini sózsiz, - dedi Nurlan Nyǵmatýlın.
Máselen, 2020 jyldan bastap taýarlardy tańbalaý jáne saýda-sattyq qyzmetinde kassalyq-baqylaý quraldaryn paıdalaný erejeleri engizildi.
Depýtattardyń usynysy boıynsha osy zań jobasynda qarastyrylǵan ónimderdi tańbalaýmen óndirýshilerdiń ózderi nemese qurylatyn Biryńǵaı ónimdi tańbalaýshy operatorlar aınalysatyn bolady. Sonymen qatar Biryńǵaı operatorǵa qalalarda ǵana emes, sonymen qatar barlyq oblystyq ortalyqtarda tańbalaý qyzmetterin usyný úshin óz fılıaldary men tıisti jabdyqtary bolýy kerek.
Jumys tobynyń zań jobasymen jumysy barysynda depýtattar birqatar túzetý engizdi. Atap aıtqanda, qolma-qol aqshasyz tólemderdi yntalandyrý maqsatynda salyqtyq ákimshilendirýdi ońaılatý; múgedekterge áleýmettik qyzmetter kórsetý kezindegi kiristerdi salyq salýdan bosatý; salynǵan ákimshilik aıyppuldy merziminen buryn tólegen kezde shartty jeńildik berý; tolyq deklarasııa berý merzimin uzartý arqyly kedendik ákimshilendirýdi ońaılatý, sondaı-aq halyqaralyq poshta jóneltilimderi kezinde kedendik rásimderdi ońaılatý; elektrondyq saýda alańdaryn damytý jáne elektrondyq saýdany júzege asyrǵan kezde satyp alýshylardyń quqyqtaryn qorǵaý jónindegi normalardy naqtylaý.
Otyrys barysynda depýtattar tarapynan qoldaýǵa ıe bolyp, maquldanǵan ratıfıkasııalyq zań jobalarynyń qatarynda Qazaqstan men Iordan Hashımıt Koroldigi arasyndaǵy qylmystyq ister boıynsha ózara quqyqtyq kómek týraly, adamdardy ustap berý jáne sottalǵan adamdardy berý týraly kelisimder bar.
Jalpy otyrys sońynda Májilis depýtattary depýtattyq saýaldar joldady. Olar - Q. Sultanov, M. Qazbekova, M.Magerramov, N.Jumadildaeva.
