Muragerler quqy shektelmeıdi
Jalpy, otyrys barysynda depýtattar Elbasynyń «Qazaqstan Respýblıkasynyń keıbir zańnamalyq aktilerine menshik quqyǵyn qorǵaýdy kúsheıtý, tórelik, sot júktemesin ońtaılandyrý jáne qylmystyq zańnamany odan ári izgilendirý máseleleri boıynsha ózgerister men tolyqtyrýlar engizý týraly» Zańnyń 1-baby 2-tarmaǵynyń 5) jáne 6) tarmaqshalary boıynsha qarsylyqtarymen kelisti.
Memleket basshysynyń atalǵan zań boıynsha kelispegen nemese burynǵy kúıinde qaldyrýǵa baılanysty usynystaryn depýtattarǵa Prezıdent Ákimshiligi Basshysynyń orynbasary Álııa Raqysheva jetkizdi.
– О́zderińizge belgili, Parlament 2018 jylǵy 27 jeltoqsanda atalǵan zańdy qabyldap, ol 28 jeltoqsanda Memleket basshysynyń qol qoıýyna engizildi. Qabyldanǵan zań 2017 jylǵy 31 qańtardaǵy jáne 2018 jylǵy 5 qazandaǵy Prezıdenttiń Joldaýlaryn iske asyrýǵa baǵyttalǵan. Prezıdent tutastaı alǵanda bul zańǵa qoldaýyn bildiredi, biraq qabyldanǵan zań alyp tastaǵan azamattardyń múliktik quqyqtarynyń kepildikteri týraly zańnamanyń jekelegen qoldanystaǵy erejelerin saqtaý qajet dep oılaıdy. Baıandalǵandy eskere otyryp, Qazaqstan Konstıtýsııasy 44-babynyń 2-tarmaqshasyna sáıkes, Memleket basshysy Zańnyń 1-baby 2-tarmaǵynyń 5) jáne 6) tarmaqshalaryn alyp tastaýdy usyndy, – dedi Á.Raqysheva.
Memleket basshysynyń muragerlikke quqyly azamattardyń quqyqtaryn shektemeý týraly usynysymen depýtattar tolyq kelisti.
Koroldik qylmyskerge pana emes
Bas prokýrordyń orynbasary Andreı Lýkın Májilistiń minberine úsh ret kóterilip, Qazaqstan men Iordan Hashımıt Koroldigi arasyndaǵy ózara quqyqtyq kómek, adamdardy ustap berý jáne sottalǵan adamdardy ustap berý týraly 2017 jyly 1 qarashada Astanada qol qoıylǵan kelisimderdi ratıfıkasııalaý týraly zań jobalaryna baılanysty baıandama jasady.
Onyń aıtýynsha, Qazaqstan men Iordan Hashımıt Koroldigi arasyndaǵy qarym-qatynastar deńgeıi joǵary. Qazirgi ýaqytta eki el arasyndaǵy qorǵanys ónerkásibi, farmasevtıka, aýyl sharýashylyǵy jáne energetıka salalarynda baılanys arta túsken. Oǵan qosa, 2006 jyldan beri saýda-ekonomıkalyq, ǵylymı-tehnıkalyq qarym-qatynastardy tereńdetýge baǵyttalǵan úkimetaralyq komıssııa jumys isteıdi.
– Bul kelisimder halyqaralyq talaptarǵa sáıkes keledi. Atalǵan kelisimder azamattardyń quqyqtary men bostandyqtaryna qatysty bolǵandyqtan, ratıfıkasııalanýy tıis, – dedi A.Lýkın.
Bas prokýror orynbasarynyń aıtýynsha, mundaı quqyqtyq kelisim jasalmaǵan memleketter qylmyskerlerdi ustap berýde ózara baılanysty jáne senimdi negizge alady. Máselen, ótken jyly Germanııa izdeýde júrgen Qazaqstannyń úsh azamatyn qaıtarǵan.
Bas prokýratýra bastamashy bolǵan zań jobalary tolyq maquldandy.
Kásipkerler tynysy ashylady
Depýtattar jalpy otyrysta bıznes-ortany damytý jáne saýda qyzmetin retteý máseleleri qarastyrylǵan zań jobasyn eki oqylymda maquldady. Atalǵan qujattyń mańyzdylyǵyna toqtalǵan Májilis Tóraǵasy Nurlan Nyǵmatýlın zań jobasy Memleket basshysynyń bıznes-ortany odan ári damytý jónindegi tapsyrmasyn iske asyrý maqsatynda ázirlengenin atap ótti.
Onyń aıtýynsha, qabyldanǵan túzetýler kásipkerlikti qoldaýdyń tıimdi tetigin qurýǵa múmkindik bermek. О́ıtkeni bul eń aldymen jańa kásiporyndar ashý, nesıe alý, qurylysqa ruqsat berý jáne salyq salýǵa jaǵdaı jasaýdy kózdeıdi.
– Jańa ózgerister bıznes salasyn damytýǵa, saýda qyzmetin nyǵaıtýǵa erekshe yqpal etetin bolady. Sonymen birge kásipkerler úshin de óte tıimdi bolyp tabylady. Osynyń barlyǵy shaǵyn jáne orta bıznestiń ekonomıkalyq qýatyn kúsheıtýge serpin beretini sózsiz, – dedi Nurlan Nyǵmatýlın.
Máselen, zań jobasyna 2020 jyldan bastap taýarlardy tańbalaý jáne saýda-sattyq qyzmetinde kassalyq-baqylaý quraldaryn paıdalaný erejeleri engizildi.
Sondaı-aq depýtattar qolma-qol aqshasyz tólemderdi yntalandyrý maqsatynda salyqtyq ákimshilendirýdi ońaılatý, múgedekterge áleýmettik qyzmetter kórsetý kezindegi kiristerdi salyq salýdan bosatý, salynǵan ákimshilik aıyppuldy merziminen buryn tóle-
gen kezde shartty jeńildik berý, tolyq deklarasııa berý merzimin uzartý arqyly kedendik ákimshilendirýdi ońaılatý, sondaı-aq halyqaralyq poshta jóneltilimderi kezinde kedendik resimderdi jeńildetý, elektrondy saýda alańdaryn damytý jáne elektrondy saýdany júzege asyrǵan kezde satyp alýshylardyń quqyqtaryn qorǵaýǵa baılanysty túzetýler engizgen.
«Jýsan» operasııasy týraly kıno qajet
Jalpy, otyrys sońynda Májilis depýtaty Qýanysh Sultanov Úkimet basshysy Baqytjan Saǵyntaevtyń atyna joldaǵan saýalynda qańtar aıynyń basynda Memleket basshysy Nursultan Nazarbaevtyń tapsyrmasymen Sırııadan 47 adamdy elge qaıtarýǵa baǵyttalǵan «Jýsan» operasııasynyń sátti ótkendigin aıta kele: «Prezıdent mundaı qaıyrymdylyq ári gýmanızm aktisine bastamashy bolý arqyly Qazaqstan azamattarynyń qaı jerde bolsa da olardyń taǵdyryna degen qamqorlyǵy men alańdaýshylyǵyn kórsetti», dedi.
Osyǵan oraı operasııaǵa daıyndyq jáne ony ótkizýdegi qıyndyqtar men qaýip-qaterlerdi baıandaıtyn fılm túsirý qajettigin málimdedi.
«Memleket basshysy Nursultan Nazarbaevtyń arnaıy tapsyrmasymen joǵary deńgeıde júzege asyrylǵan qazaqstandyq azamattardy qutqarý operasııasy sekildi erekshe oqıǵalar óskeleń urpaqqa patrıottyq tárbıe beretin joǵary kórkemdik kıno túsirýge tamasha sıýjet bolar edi. Osyǵan baılanysty, birinshiden, memlekettik tapsyrys boıynsha «Jýsan» operasııasy negizinde shytyrman oqıǵaly, derekti, patrıottyq tárbıedegi kórkem fılm túsirýge tapsyrma berýińizdi suraımyn. Ekinshiden, Prezıdenttiń ústimizdegi jyldy Jastar jyly dep jarııalaýyna baılanysty jastardyń rýhanı jáne patrıottyq tárbıesi jalpy memlekettik múdde bolǵandyqtan jastardyń patrıottyq jáne rýhanı tárbıesiniń keshendi jospary men sharalaryn qarastyrý jón bolar edi», dedi Q.Sultanov óz saýalynda.
Sonymen qatar depýtattar – Merýert Qazbekova, Magerram Magerramov jáne Natalıa Jumadildaevalar da ortalyq atqarýshy organdardyń basshylaryna saýaldaryn joldady.
Serik ÁBDIBEK,
«Egemen Qazaqstan»
