Baıandamada qamtylǵandaı, aýdan boıynsha ortasha jalaqy 102 myń teńgeni quraǵan. 2700 qyzmetkerdiń eń tómengi jalaqy mólsheri 1,5 ese kóbeıgen. 1741 jumys orny ashylyp, 3 myńnan astam adam eńbekpen qamtylǵan. Aýyl joldaryn qalpyna keltirýge 35 mıllıon teńge jumsalǵan. 15 myń sharshy metr baspana qoldanysqa berilgen.«Dıplommen – aýylǵa» memlekettik baǵdarlamasy boıynsha 40 jas maman kelgen. Olarǵa qarjylyq járdem kórsetilgen.
Ákimniń esebine jınalǵan jurtshylyq birneshe jyldan beri sheshimin tappaı kele jatqan problemalardy bıyl taǵy da qozǵady. Ásirese, jol jóndeý, qoǵamdyq kólik qatynasy, abattandyrý men jaryqtandyrý jaıy áli ótkir tur. Tatıana Torgasheva Petropavldaǵy balalar úıinde tárbıelenipti. Ata-ana qamqorlyǵynsyz ósken boıjetken qazir Beskóldegi mektepterdiń birinde ustaz bolyp qyzmet isteıdi. Áli kúnge deıin basybaıly páteri joq. Qyzmettik baspanany panalaýǵa májbúr. Úıdiń kezeginde turǵanyna 10 jyldan asypty. Osydan birer aı buryn halyqtyń áljýaz toptary úshin 30 páterlik úı qoldanysqa berilgenimen, ilikpeı qalypty. Ol qurbylarym qonys toıyn toılady, meniń kezegim qashan jetedi dep nazalanady.
Aýdan ákimi oǵan qazir 5 qabatty eki turǵyn úıdiń jobalaryn ázirlep jatyrmyz. Olar jeke ınvestısııa boıynsha jáne jaldamaly baspana retinde memleket qarajatyna salynady dep jaýap berdi.
Zeınetker Ermek Muqanov otbasymen Beskóldiń ońtústik-shyǵys aýdanynda turady. Balalary men nemereleri oblys ortalyǵynan atasy men ájesine qonaqqa kelý úshin 101-shi avtobýspen qatynaıdy eken. Eki arany jalǵastyratyn jalǵyz qoǵamdyq kólik ol turatyn aýdanǵa barmaıtyn kórinedi. Qarııanyń tarapynan ońtústik-shyǵys Beskól aımaǵy men Esenın kóshesi arqyly júretin jańa marshrýt ashyp berseńizder, bul jaqta oqýshylar kóp, al mektep bolsa alys, balalarǵa jaıaý qatynaý óte qıyn degen usynys aıtylǵanymen, aıaqsyz qalyp keledi. Beskól aýyldyq okrýginiń ákimi Erbol Bagenov máseleniń baqylaýǵa alynǵanyn, qoǵamdyq kólik baǵytyn “Mıras” balabaqshasynan ári uzartý múmkindigi qarastyrylyp jatqanyn jetkizdi.
Aqjar aýdanynda ótken ákim esebinde zeınetker Marat Jetepov Alqaterek aýylynan 14 shaqyrym jerde ornalasqan uńǵymadan sý tartý máselenin kóterse, Aısulý Júsipova sharýa qojalyqtaryna jaıylymdyq, shabyndyq jerler jetispeıtinin alǵa tartty. Zeınetker Qaıyrkósh Jumataev joldyń sapasyzdyǵyna qynjylys bildirdi.
Aıyrtaý aýdany Volodar aýyldyq okpýginiń turǵyndary sý súzgisi isten shyqqandyqtan tirshilik náriniń sanıtarlyq-gıgıenalyq talaptarǵa sáıkes kele bermeıtinin, Aqan-Burlyq eldi mekeniniń jurtshylyǵy nan sapasynyń, medısınalyq qyzmettiń tómendigin jetkizdi.
О́mir ESQALI,
«Egemen Qazaqstan»
Soltústik Qazaqstan oblysy
