Atyraý oblysynyń ákimi Nurlan Noǵaevtyń tapsyrmasy boıynsha 2019 jyldyń aqpanynan bastap memlekettik organdardyń basshylary áleýmettik jelilerdegi Atyraý oblystyq ákimdiginiń resmı paraqshalarynda tikeleı efırge shyǵyp, halyqqa esep berýdi bastady.
1 aqpanda áleýmettik jeli qoldanýshylarynyń saýaldaryna oblystyq jumyspen qamtýdy úılestirý jáne áleýmettik baǵdarlamalar basqarmasy basshysynyń mindetin atqarýshy Ulyqbek Tinálıev pen qalalyq jumyspen qamtý jáne áleýmettik baǵdarlamalar bólimi basshysy Nurly Habıeva jaýap berdi.
- Atyraý oblysynyń ákimi Nurlan Noǵaevtyń tapsyrmasy boıynsha biz áleýmettik jeliler arqyly jasalyp jatqan jumystar men josparlar týraly aıtamyz. Qazir turǵyndardyń kópshiligi aqparatty áleýmettik jelilerden alatyndyqtan osy úrdisti durys dep oılaımyz. Biz ashyq dıalogqa, jumysymyzdy anyq, adal jasaýǵa qashan da daıynbyz, - deıdi oblystyq jumyspen qamtýdy úılestirý jáne áleýmettik baǵdarlamalar basqarmasy basshysynyń mindetin atqarýshy Ulyqbek Tinálıev.
Jumyspen qamtý, járdemaqy esepteý, ózin ózi jumyspen qamtyp otyrǵan turǵyndardyń máseleleri talqylanǵan tikeleı efır eki saǵatqa sozyldy. Tikeleı efırdi 5 myńǵa jýyq adam qarap, 100-den astam suraq qoıyldy.
Baqytgúl BABASh,
«Egemen Qazaqstan»
Atyraý
