Qazir oblys ákimi Danıal Ahmetovtiń dárigerlerge aǵylshyn tilin oqytý jónindegi tapsyrmasyna sáıkes 20-ǵa jýyq medısına qyzmetkerlerine aǵylshyn tilin oqytyp jatqan jaıymyz bar. Biz tek til úıretýmen ǵana shuǵyldanbaımyz, ártúrli is-sharalar ótkizemiz. Shyǵys Qazaqstan oblystyq lıngvıstıkalyq ortalyǵymen birlese jumys isteımiz», - deıdi ortalyq dırektory Aınash Álibekqyzy.
Jıyrma dárigerdiń qatarynda osy ortalyqta aǵylshyn tilin úırenip jatqan Besqaraǵaı aýdandyq ortalyq aýrýhanasynyń feldsheri Sáýle Kýrkýmbaevamen sóıleskenimizde til oqytý kýrsyna úsh aıdan beri baryp júrgenin aıtty. «О́zim eńbek etetin aýrýhanadan bir emes, birneshe kisi aǵylshyn tilin úırenip jatyrmyz. Qazir oblystyń dárigerleri biliktiligin arttyrý úshin shet elderge jiberilip jatyr ǵoı. Meni de jibergen jaǵdaıda daıyn bolaıyn dep osy kýrsqa jazyldym. Jalpy, til bilgenniń artyqtyǵy joq qoı», - deıdi dáriger.
Ortalyq janynan «English speaking club», «Ádemi sóıle» sheshendik sheberlik klýbtary men «TEDxBESK» degen konferensııa-stýdııa ashylypty. Aınash Álibekqyzy sheberlik klýby men stýdııa osyndaǵy til úırenýshilerdiń óz oıyn qysylmaı, ashyq ári erkin jetkizýine, kórkem de kesteli sóıleýine mashyqtandyrý hám latyn álipbıin oqytý maqsatynda ashylǵanyn aıtady. «Sheshendik sheberlik klýby byltyr 16 jeltoqsan – Táýelsizdik kúni merekesinde aýdan ákimi Dáýlet Batyrbaevtyń qatysýymen ashyldy. Bul bizdiń bilýimizshe tilderdi oqytý ortalyǵy janynan ashylyp otyrǵan alǵashqy klýb bolýy kerek. Aldaǵy ýaqytta til úırenýshilerdiń sheshendik sheberligin shyńdaý úshin tanymal tulǵalardy shaqyrý josparymyzda bar», - deıdi ortalyq dırektory.
Reti kelgende aıta keteıik, ortalyq dırektory Aınash Álibekqyzy memlekettik tildi oqytý boıynsha ótken oblystyq baıqaýda top jaryp, Ahmet Baıtursynov atyndaǵy respýblıkalyq baıqaýǵa qatysyp qaıtypty.
Azamat QASYM,
«Egemen Qazaqstan»
Shyǵys Qazaqstan oblysy,
Besqaraǵaı aýdany
