Memleket basshysy 2018 jylǵy 5 qazandaǵy «Qazaqstandyqtardyń ál-aýqatynyń ósýi: tabys pen turmys sapasyn arttyrý» Qazaqstan halqyna arnaǵan Joldaýynda Úkimet úsh jyl ishinde ekonomıkadaǵy kóleńkeli aınalymdy kem degende 40%-ǵa qysqartý úshin naqty sharalar qabyldaýǵa tıis ekenin atap ótti. Sondaı-aq, Elbasy bıznes óz jumysyn jańadan bastaý úshin 2019 jyldyń 1 qańtarynan bastap salyqtyń negizgi somasy tólengen jaǵdaıda, ósim men aıyppuldy alyp tastaı otyryp, shaǵyn jáne orta bıznes úshin «salyq amnıstııasyn» júrgizýge kirisýdi tapsyrdy.
«Bul tapsyrmany oryndaý aıasynda biz búginde tıisti sharalardy qolǵa aldyq. Atap aıtar bolsaq, salyqtyń negizgi somasyn tólegen jaǵdaıda ósimpul men aıyppuldy esepten shyǵarý arqyly salyq amnıstııasyn júrgizýge múmkindik beretin negizgi zańnamalyq ózgerister engizildi. Bul zańnamaǵa Elbasy ótken jylǵy 28 jeltoqsanda qol qoıdy. Atalǵan zańnama osy jyldyń 1 qańtarynan bastap kúshine endi», — dedi qarjy vıse-mınıstri.
Qarjy mınıstriniń 21 qańtardaǵy №39 buıryǵyna sáıkes, salyq tóleýshilerdiń negizgi bereshegin tólegen jaǵdaıda ósimpul men aıyppuldaryn esepten shyǵarý týraly qaǵıda bekitildi. Bul qaǵıda búginde resmı túrde jarııalanǵan jáne 8 aqpanda kúshine enedi.
«Osy qaǵıda kúshine engennen keıin 2 kúnniń ishinde memlekettik salyq organdarynyń barlyq aýdandardaǵy basqarmalarda tıisti komıssııa qurylatyn bolady. Bul komıssııanyń negizgi jumysy – kúndelikti salyq amnıstııasyna qatysatyn salyq tóleýshilerdiń derbes shottaryna monıtorıng jasap otyrý, salyq tóleýshi salyqtyń negizgi somasyn tólegen jaǵdaıda, komıssııa úsh kúnniń ishinde sheshim qabyldaıdy. Sosyn úsh kún ishinde salyq tóleýshiniń derbes shotynan aıyppul men ósimpul alynyp tastalady. Elbasy aıtqandaı sol kúnnen bastap salyq tóleýshi óziniń qyzmetin taza paraqtan bastaýǵa múmkindik alady», — dedi vıse-mınıstr.
Suhbat barysynda qarjy vıse-mınıstri Q. Baedilov salyq amnıstııasyna jatatyn salyq tóleýshiler týraly aıtyp berdi.
«Salyq amnıstııasyna 2018 jylǵy 1 qazandaǵy jaǵdaıǵa sáıkes, ózderiniń derbes shottarynda salyq bereshekteri bar salyq tóleýshiler jatady. Eger ShOB sýbektileri ózderiniń derbes shottaryndaǵy tólenbegen salyqtarynyń negizgi bóligin tólese, onda olardyń derbes shotynan aıyppul men ósimpul alynyp tastalady. Sondaı-aq, derbes shottarynan 2018 jylǵy 1 qazannan bastap negizgi somasyn tólegen kúnge deıin eseptelgen aıyppuldy da alyp tastaımyz. Buǵan osy zań múmkindik beredi. Salyq amnıstııasyna zań boıynsha monıtorıngte turǵan iri mekemeler, aksızdendiriletin ónimderdi shyǵaratyn salyq tóleýshiler, sondaı-aq, jer qoınaýyn paıdalanýshylar jatpaıdy. Biraq aıta ketetin jaǵdaı, jer asty sýyn jáne emdik maqsatta shyǵarylatyn balshyqtardy óndiretin salyq tóleýshiler osy múmkindikterdi paıdalana otyryp, salyq amnıstııasyna qatysa alady. Sonymen qatar, kásipkerlikpen aınalysatyn jeke tulǵalar salyq amnıstııasyna jatpaıdy», — dedi vıse-mınıstr.
Sonymen qatar, qarjy vıse-mınıstri osyǵan deıin ótkizilgen salyq amnıstııalarynyń nátıjelerine toqtalyp ótti.
«Buǵan deıin ótkizilgen sońǵy eki salyq amnıstııalarynda shaǵyn jáne orta bıznes sýbektileriniń derbes shottarynda turǵan 143 mlrd teńgege jýyq aıyppuldar men ósimpuldar esepten shyǵaryldy. Bul óte úlken qarajat. Bul memleket tarapynan ShOB sýbektilerine kórsetilgen úlken qoldaý sharasy ári eki jaqqa da tıimdi. Atalǵan esepten shyǵarylǵan somanyń arqasynda bıznes sýbektileri ózderiniń aınalymdaǵy aqshalaryn únemdep qaldy, sol aqshany ózderiniń kásiporyndaryn odan ári damytýǵa jumsady, jumys oryndaryn saqtap qaldy, eń bastysy salyq amnıstııasyn júrgizgennen keıin aldaǵy ýaqytta salyq salý bazasy keńeıtiledi», — dedi.
Qarjy vıse-mınıstriniń aıtýynsha, sońǵy eki salyq amnıstııasyna 122 myń zańdy tulǵa men jeke kásipker qatysqan. Búgingi kúni solardyń 67% ónimdi jumys istep jatyr, memleket aldynda eshqandaı qaryzdary joq. Sońǵy ótken salyq amnıstııasynyń birden bir jaqsy nátıjesi osy.
«О́kinishke oraı elimizde keıbir azamattar salyq tóleý máselesine nemquraıly qaraıdy. Mysaly, 2019 jylǵy 1 qańtardaǵy jaǵdaı boıynsha 1,3 mln adamnyń memleket aldynda qaryzdary bar. Olardyń qaryzdarynyń jalpy sany 21 mlrd tg asyp otyr. Bul jeke tulǵalar úshin óte úlken soma dep esepteımin. Keıbir azamattar tipten ózderiniń salyq bereshekteri bar ekenin bilmeıdi jáne bul týraly shet elge shyqqan kezde nemese basqa jaǵdaılarda bilip jatady. Sondyqtan da salyq tóleýge durys kóńil bólý kerek dep oılaımyn», — dedi qarjy vıse-mınıstri.
