– Men Qazaqstan quramasynyń bas bapkeri bolǵanyma qýanyshtymyn. Jigitterdiń qarqynyn, oıynǵa degenin daıyndyǵyn baıqaý úshin bir aptalyq oqý-jattyǵý jıynyn ótkizemiz. Erteń Túrkııaǵa ushyp, barlyq bapkerlermen sóılesemin. Olar maǵan ulttyq quramanyń oıyn stılin aıtyp, ortaq jumys barysynda maǵan kómekteskenin qalaımyn.
– Qazaqstan ulttyq quramasyn jattyqtyrý úshin qansha ýaqyt oılandyńyz?
– Men sheshimdi tez qabyldadym. Shamamen úsh aptanyń ishinde kelissóz júrgizip, óz kelisimimdi berdim. Degenmen sheshim qabyldaý ońaı bolǵan joq, óıtkeni sol ýaqytta chehııalyq komandamen kelisimshartym bolǵan edi. Biraq komanda meni túsinip, Qazaqstan quramasymen jumys isteýime qarsylyq bildirgen joq.
– Ulttyq quramanyń keńeıtilgen tizimi qalaı tańdaldy?
– Men áli fýtbolshylar týraly tolyq málimetke ıe emespin. Sondyqtan maǵan áli fýtbolshylar týraly aqparat jınaý kerek. Bul tizimdi kómekshilerim jasaqtap berdi. Men olardy iriktep alamyn.
– Ulttyq quramamen kelisimshartyńyz qansha jylǵa josparlanǵan. Qazaqstanǵa kelgenge deıin qandaı aqparat bildińiz?
– Kelisimshart bir jylǵa josparlanǵan. «Astananyń» Eýropa lıgasyndaǵy «Slavııaǵa» qarsy ótken oıyny esimde qalypty. Sonymen qatar Qazaqstannyń burynǵy bas bapkeri Mıroslav Beranekpen de sóılestim.
– Keńeıtilgen quramǵa qorǵaýshy Evgenıı Postnıkov pen jartylaı qorǵaýshy Baqtıer Zaınýtdınov nege ilinbeı qaldy?
– Sebebi, Postnıkovtyń jaraqaty bar. Zaınýtdınovty da quramaǵa shaqyrǵymyz kelgen. Biraq «Rostov» komandasynyń Reseı kýbogynda oıyny bar bolǵandyqtan jáne 21 aqpan FIFA kúntizbesine enbegen soń klýb bapkeri Valerıı Karpın Baktıerdi jibermeýdi jón sanapty.
– Bılek myrza, eger sizdiń quramańyz Eýro-2020 týrnırinde sátsiz óner kórsetse qyzmetińizden ketýińiz múmkin. Budan qoryqpaısyz ba?
– Eshteńeden qoryqpaımyn. Árıne, tobymyz qıyn. Biraq men Qazaqstannyń Ulttar lıgasyndaǵy birneshe oıynyn kórdim. Mundaı komandamen birazǵa barýǵa bolady. Aldaǵy ýaqytta quramaǵa shaqyrǵan fýtbolshylarym jasyl alańda baryn salyp oınaıtyn bolady. Biz durys taktıka oılastyrsaq, jeńiske jetýge múmkindigimiz joǵary bolmaq.
Álı BITО́RE,
«Egemen Qazaqstan»
