Astana qalasy ákiminiń baspasóz hatshysy Elvıra Júrgenbaeva brıfıng barysynda elorda ákiminiń qaıtys bolǵan balalardyń ata-anasyna, týǵan-týystaryna qaıǵyra kóńil aıtyp, qolynan kelgen kómektiń bárin jasaýǵa daıyn ekendigin jetkizdi.
«Qaıǵyly jaǵdaıǵa baılanysty qala ákimi Baqyt Sultanov shuǵyl jıyn ótkizip, quzyretti organdarǵa bolǵan jaǵdaıdyń barlyq mán-jaıyn anyqtaýdy tapsyrdy. Jıynnan soń Baqyt Sultanov «Saryarqa» aýdanynyń ákimi Arman Turlybekpen birge oqıǵa ornyna baryp, otbasyna kóńil aıtty. Baqyt Sultanov aýdan ákimine qajetti barlyq materıaldyq, medısınalyq kómek kórsetýdi jáne jerleý rásimin uıymdastyrýǵa kómektesýdi tapsyrdy. Qazir qaza tapqan balalardyń ata-anasymen psıhologtar, áleýmettik qyzmet mamandary jumys isteýde», – dep málimdedi Elvıra Júrgenbaeva.
TJD bastyǵynyń mindetin atqarýshy Marǵulan Amanbaevtyń aıtýynsha, osyǵan deıin «Kóktal-1» turǵyn alabynda órt jáne basqa da tótenshe jaǵdaılardyń aldyn alý maqsatynda profılaktıkalyq jumystar júrgizilgen. Atalmysh jumystardyń barysynda TJD-niń qyzmetkerleri bul úıge baryp, otbasy múshelerine olqylyqtardy joıýǵa qatysty eskertý jasaǵan bolatyn.
«Baqyt Sultanov aýdan ákimderi men tótenshe jaǵdaılar departamenti jáne polısııa birlesip, jeke sektordaǵy ár úıge baryp órt qaýipsizdigi erejelerin saqtaý turǵysynda qaıtadan tekseris, túsindirý jumystaryn júrgizýdi talap etti. Astana ákimdigi Kemerovtaǵy oqıǵadan soń, órt qaýipsizdigi týraly máseleni birneshe ret kóterip, TJD-ti ózge de vedomstvolarmen birlesip birqatar reıd júrgizdi», – dedi E. Júrgenbaeva.
Astana qalasynyń Jumyspen qamtý, eńbek jáne áleýmettik qorǵaý basqarmasynyń aqparatynsha, balalardyń anasy plastıkalyq karta shyǵaratyn zaýytta, al ákesi TQKS-da montajdaýshy bolyp jumys isteıdi. Ákimniń baspasóz hatshysynyń aıtýynsha, otbasy jergilikti atqarýshy organdardan kómek suramaǵan, jeke turǵyn úı kezeginde turmaǵan, kópbalaly otbasy retinde járdemaqy alyp turǵan. Qaza tapqan bes balanyń ekeýi mektepte oqyǵan bolsa, 2014 jyly týǵan bala memlekettik balabaqshaǵa barǵan, al qalǵan ekeýi kezekte turǵan. Qalǵan ekeýi balabaqsha kezeginde turypty.
«Mektep tarapynan otbasyǵa memlekettik jáne demeýshilik qoldaý kórsetildi. Muǵalimderdiń aıtýynsha, balalar sabaqtan qalmaǵan, qatarlastarymen jaqsy aralasqan. Astana ákimi qaıtys bolǵan balalardyń ata-anasyna, týǵan-týystaryna qaıǵyra kóńil aıtyp, qolynan kelgen kómektiń bárin jasaýǵa daıyn», – dedi Elvıra Júrgenbaeva.
