Bıyl konferensııa ótkizý quqyǵyna NÝ-men birge Sıngapýr, Japonııa, Qytaı, Taıvan jáne Úndistan ýnıversıtetteri kúresti.
NÝ Gýmanıtarlyq jáne áleýmettik ǵylymdar mektebiniń stýdenti jáne Nazarbaev Ýnıversıtetiniń Stýdenttik úkimetiniń prezıdenti, The HPAIR Astana 2019 Uıymdastyrý komıtetiniń jetekshisi Leıla Ahmetova atap ótkendeı, túpkilikti sheshim qabyldaý maqsatynda Garvard ýnıversıtetiniń (AQSh) HPAIR Uıymdastyrý komıtetiniń múshelerinen qurylǵan delegasııa Astana qalasyna kelip, Nazarbaev Ýnıversıtetiniń uıymdastyrý komıtetiniń múshelerimen kelissózder ótkizdi. Endi Nazarbaev Ýnıversıtetiniń komandasy is-sharany birlesip daıyndaý maqsatynda Garvardqa attanady.
Aıta ketetin jáıt, HPAIR-2019 konferensııasy Astana qalasynda Jastar jyly ótedi jáne qazaqstandyq jas urpaqqa jańa múmkindikterdi usynady. Is-sharanyń kún tártibine alty taqyryptyq panelder kiredi: 1) áleýmettik saıasat jáne ınklıýzıvtik damý, 2) álemdik ekonomıka, 3) qaýipsizdik jáne dıplomatııa, 4) bıznes jáne tehnologııalar, 5) qorshaǵan ortanyń turaqtylyǵy jáne energetıka, 6) mádenıet jáne medıa.
«Azııa jáne halyqaralyq qatynastar jónindegi Garvard jobasy (The Harvard College Project for Asian and International Relations / HPAIR)» konferensııasy Azııa elderinde Garvard ýnıversıtetiniń bastamasymen ótetin eń iri stýdenttik konferensııa bolyp tabylady. Konferensııa stýdentter men jas mamandar úshin Tynyq muhıt aımaǵyndaǵy jáne Azııa elderindegi eń mańyzdy ekonomıkalyq, saıası jáne áleýmettik máselelerdi talqylaý maqsatynda pikirtalas alańy retinde quryldy. Konferensııa 1991 jyldan bastap 32 000 qatysýshylardy tarta otyryp, álemniń 12 elindegi joǵary oqý oryndarynda ótti. Konferensııanyń burynǵy spıkerleriniń arasynda elderdiń kóshbasshylary, tanymal ǵalymdar men Nobel syılyǵynyń laýreattary, dıplomattar, halyqaralyq uıymdardyń basshylary bar.
