Bul kórmede О́zbekstannyń zamanaýı beıneleý óneri ózindik kórkemdiligimen erekshelenip, qylqalam sheberleriniń týyndylary qazaq alańynda jańa qyrynan usynyldy. Kórmege Faızýlla Ahmadalıev, Hýrshıd Zııahanov, Nodır Shoabdýrahımov, Alısher Alıkýlov, Valerııa Enına, Vıktorııa Troshına, Dılorom Mamedova, Bahtııor Obıdov, Abdýhakım Karımov, Dılmýrod Iýldashev, Ýmar Rajabov sııaqty tanymal sýretshiler men jas avtorlardyń sońǵy bes jyl ishinde túsirgen 38 sýreti qoıylǵan.
Fotoóner – kópjanrly, ómirdi ár qyrynan tanytatyn, ózindik sıpaty men shyǵarmashylyq qoltańbasy qalyptasqan sala. «Zamanaýı О́zbekstan» fotokórmesi A.Jumaev, V.Goncharenko, H.Shorahmedov, V.Shlosberg, V.Vıatkın, V.Sokolov syndy sheberlerdiń 100 fotosýretinen turady. Kórmeden ózbek beıneleý óneriniń sońǵy on jyldaǵy zamanaýı sıpatymen qatar, ulttyq tarıhtyń otarlaý kezeńinen keıingi ulttyq beıneleý óneri mektebiniń qalyptasýyna deıingi ártúrli dıskýrstaryn, keleshek urpaq úshin ózekti sanalatyn mańyzdy kózqarastar men mindetterdiń kórinisin oımen baǵamdap, súısinip tamashalaýǵa múmkindik bar.
О́zbekstan Respýblıkasynyń Qazaqstandaǵy Tótenshe jáne ókiletti elshisiniń keńesshisi Tımýr Rahımov: Qazaqstanda О́zbekstan jylyn ótkizý kezinde 200-den astam túrli shara uıymdastyrylyp, keńinen nasıhattalǵan ózbek eliniń tarıhy, mádenıeti qazaqstandyqtar tarapynan úlken qoldaý tapty.Osyndaı mádenı sharalar arqyly eki el arasyndaǵy baılanys qarqyndy túrde damıtynyna senemin. Búgingi kórme de kópshiliktiń kóńilinen shyǵady dep úmittenemiz», dep razylyǵyn jetkizdi.
Baǵashar TURSYNBAIULY,
«Egemen Qazaqstan»
