Aldyn ala derekter boıynsha 2019 jyly aýyl sharýashylyǵy daqyldaryn 22,3 mln gektarǵa egý josparlanyp otyr, bul 2018 jylmen salystyrǵanda 290,7 myń gektarǵa kóp. Bul rette, suranysqa ıe mynadaı daqyldar alańy: 1) arpa men astyqqa arnalǵan júgeri – 57,2 myń gektarǵa; 2) qant qyzylshasy – 2,6 myń gektarǵa; 3) azyqtyq daqyldar – 654,1 myń gektarǵa; 4) kartop – 14,2 myń gektarǵa; 5) kókónis-baqsha daqyldary – 8,0 myń gektarǵa ulǵaıtylady.
«Memlekettik baǵdarlama aıasynda 2021 jylǵa deıin 610 myń gektar sýarmaly jerdi aınalymǵa engizý kózdelip otyr. О́tken jyly 65 myń gektar jer paıdalanýǵa engizilse, bıyl 124 myń gektar jerdi aınalymǵa tartý qajet» deıdi Aýyl sharýashylyǵy mınıstri.
Mınıstrdiń aıtýynsha, ázirlengen salalyq baǵdarlama 1,5 mln gektar sýarmaly jerdi jańadan aınalymǵa engizýge múmkindik beredi. Osy mindetti sheshý úshin memlekettik-jekeshelik áriptestik shemasy boıynsha qarjylandyrýǵa kóshý kerek. Investısııalardyń qaıtarylýyn qamtamasyz etý maqsatynda ekonomıkalyq negizdelgen tarıftik saıasat engiziletin bolady. Bul tásildeme bıznes ókilderimen pysyqtaldy.
«Otyrar Bıo Teh» kompanııasy Túrkistan oblysynda jalpy alańy 60 myń gektar sýarmaly jerdi ıgerý úshin ınvestısııa salýǵa daıyn. Qazaqstandaǵy CITIC CONSTRUCTION CO., LTD fılıaly Pavlodar oblysynda jańa 10 myń gektar sýarmaly jerdi paıdalanýǵa engizýge kirispek. Bul jobaǵa kompanııa óz ınvestısııasyn tartady. Alynǵan ónimdi ótkizetin jeri de daıyn. Jalpy, salaǵa aldaǵy 9-10 jylda 1,23 trln teńge tartylyp, sýarmaly jerler 3,5 mln gektarǵa jetkiziledi, al osy jerlerden alynǵan ónim kólemi 3,7 trln teńgeni quraıtyn bolady» deıdi mınıstr О́. Shókeev.
