Joba týraly Agenttiktiń aýmaqtyq departamentiniń sybaılas jemqorlyq profılaktıkasy basqarmasynyń bas mamany Erbol Jumabaı tolyǵyraq túsindirip ótti. Negizgi mindetteri – turǵyndardyń sybaılas jemqorlyqqa qarsy minez-qulyq úlgisin odan ári damytý men jemqorlyq máselesin memlekettik qyzmet kórsetý sapasyn arttyrý arqyly sheshý, turmystyq jemqorlyqty joıý, azamattar jáne bıznes úshin kedergisiz jáne qolaıly jaǵdaılar jasaý, memlekettik organdar qyzmetiniń ashyqtyǵy, aýqymdy qoǵamdyq baqylaý júrgizý.
Joba aıasynda memlekettik mekeme qyzmetkerleriniń eńbekaqysyn qaıta qaraý, mekeme basshylarynyń jeke jaýapkershiligin arttyrý, qyzmetterdiń barlyq baǵyttary boıynsha sybaılas jemqorlyqqa qarsy is-qımyldy arttyrý jáne taǵy basqa máseleler qamtylady. Mańǵystaý turǵyndary men qonaqtary memlekettik organdardyń qyzmetin jaqsartý jáne sybaılas jemqorlyqtyń deńgeıin tómendetý, joıý boıynsha ózderiniń usynystaryn eńgize alady. Sondaı-aq, jumys barysynda týyndaǵan máselelerdi qaraý úshin kásipkerler, ǵalymdar, azamattyq sektordyń jáne BAQ ókilderi arasynan sarapshylar tartylmaq.
Sonymen qatar «Mańǵystaý – adaldyq alańy» jobasyna sáıkes, sybaılas jemqorlyqqa qarsy is-qımylda jańa ádister engizý maqsatynda joba menedjmenti qoldanylatyn bolady. Ol maqsatta, joba aıasynda Mańǵystaý oblysy ákimdiginiń, jergilikti atqarýshy organdar qyzmetkerleri qatarynan joba keńsesi qurylyp, turǵyndardyń turmys sapasyn arttyrýǵa bar kúshimizdi salamyz degen tilegin jetkizdi.
Aıta ketý kerek, jobalyq keńse «Sybaılas jemqorlyqtan ada óńirler» atty jobany júzege asyrý aıasynda elimizdiń barlyq oblystarynda ashylǵan bolatyn.
Akademııa tyńdaýshylarynyń aldynda sóz sóılegen agenttiktiń aýmaqtyq departamenti basshysynyń orynbasary Erlegen Mendalıev, qolǵa alynǵan joba aıasynda birqatar aýqymdy jumystar atqarylatynyn aıtty.
- Elbasy Nursultan Nazarbaev Qazaqstan halqyna «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty joldaýynda sybaılas jemqorlyqpen kúresti jalǵastyrý kerektigi aıtylǵan bolatyn jáne «Sybaılas jemqorlyqtan ada óńirler» jobasy aıasynda jobalyq keńselerdiń ashylýyn qamtamasyz etý tapsyrylǵan. Osy jobanyń júzege asyrylýy óńir turǵyndary arasynda sybaılas jemqorlyqqa qarsy mádenıetti qalyptastyrý boıynsha óz jemisin beredi dep senemiz, dedi ol.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy
