Ulttyq ekonomıka mınıstrligine Qarjy, Bilim jáne ǵylym mınıstrlikterimen birge jáne ákimderge mektep salý men jóndeý fýnksııalaryn olardy qarjylandyrý fýnksııalarymen birge óńirlerge berý máselesin pysyqtaý tapsyryldy. Bul bıýdjet prosesin ońaılatyp, mektepterdi salýdy nemese jóndeýdi jyldamdatýǵa múmkindik beredi.
Medısına jumyskerleriniń praktıkalyq daıarlyǵyn kúsheıtý úshin Densaýlyq saqtaý mınıstrligi praktıkalyq daǵdylandyrýǵa nazar aýdara otyryp, halyqaralyq standarttar boıynsha oqytýdyń qazirgi zamanǵy baǵdarlamalaryna kóshý jóninde usynystar engizip, ákimdermen birge bıyl memlekettik aýrýhanalardy menshikti klınıkalyq bazalar retinde medısınalyq joǵary oqý oryndaryna berý máselesin pysyqtaýy tıis.
Eńbek jáne halyqty áleýmettik qorǵaý mınıstrligi Ulttyq ekonomıka, Qarjy, Bilim jáne ǵylym mınıstrlikterimen birge:
jumys istep júrgen adamdardy úzdiksiz oqytýdyń keshendi júıesin iske qosýdy (life-long learning) qamtamasyz etýi tıis;
jumys berýshilermen yntymaqtasa otyryp, salyqtyq shegerimderdi kásiporyndardyń personalyn oqytý shyǵystaryna qoldaný múmkindigin zerdeleýi qajet;
qaıta daıarlaý jáne biliktilikti joǵarylatý kýrstaryna aqy tóleýdiń vaýcherlik negizderin qarastyrý qajet;
elektrondyq Eńbek bırjasynyń negizinde kásiptik daǵdyǵa oqytatyn, sondaı-aq, «qajetti» daǵdylardy úıretetin jáne alǵan daǵdylaryn jumys berýshiler moıyndaıtyndaı sertıfıkat beretin oqý kýrstarynyń aýqymdy tizbesi bar Jalpyulttyq oqytýdyń onlaın-portalyn iske qosýdy qamtamasyz etý tapsyryldy.
Aqparat jáne kommýnıkasııalar mınıstrligi múddeli memlekettik organdarmen birge:
memlekettik organdarda qazirgi bıznes prosesterdi túbegeıli qaıta qaraý jónindegi sharalardy ázirlesin, eń aldymen, qaǵazdan bas tartyp, 2020 jyldan bastap tolyqtaı elektrondy qujat aınalymyna kóshýi qajet;
halyqqa júrgizilip jatqan reformalar týraly únemi aqparat berip, keri baılanysty qamtamasyz etýi qajet.
Ulttyq ekonomıka mınıstrligine Qarjy mınıstrligimen birge:
áleýmettik tólemderdi esepteý jáne eńbekaqy tóleý qorynan biryńǵaı tólem túrinde tóleý tártibin ońaılatý qajet;
jeke tulǵalar úshin jer salyǵy men ondaǵy qurylysqa salynatyn salyqty jyljymaıtyn múlikke salynatyn bir salyqqa qosý máselelerin pysyqtasyn jáne kóp páterli turǵyn úılerde jer salyǵyn alyp tastaý máselesin qaraý tapsyryldy.
Indýstrııa jáne ınfraqurylymdyq damý mınıstrligi:
Densaýlyq saqtaý, Aýyl sharýashylyǵy mınıstrlikterimen jáne «Atameken» ulttyq kásipkerler palatasymen birge 2019 jyldyń ortasyna deıin «Sapaly Qazaqstan» keshendi josparyn ázirlep, qabyldasyn, onda halyqaralyq deńgeıge sáıkes keletin qazaqstandyq standarttardy, tehnıkalyq reglamentter men normalardy 3 jyl ishinde engizýdi, zamanaýı zerthanalyq bazany damytýdy eskerýi tıis;
Aqparat jáne kommýnıkasııalar mınıstrligimen, Nazarbaev Ýnıversıtetimen birge aldyńǵy qatarly ǵylymı-tehnologııalyq kompanııalardy qurylǵan ınnovasııalyq ekojúıeni, onyń ishinde Astana Business Campus pen Astana Hub halyqaralyq AT startaptar tehnoparkin odan ári damytýǵa strategııalyq áriptes retinde tartýdy pysyqtaýy tıis.
Sonymen qatar, Premer-Mınıstr Prezıdent belgilep bergen mindetterdiń bári naqty oryndalýy tıis ekenin atap ótti. Memlekettik organdardyń basshylaryna Memleket basshysynyń tapsyrmalaryn iske asyrý boıynsha usynystardy Úkimettiń aǵymdaǵy jylǵy jumys josparyna qosý úshin Ulttyq ekonomıka mınıstrligine úsh kún merzimde engizý tapsyryldy.
