Semeıde áıel adamdar arasyndaǵy sút bezi obyrynan keıin jatyr moıny qaterli isigi ekinshi orynda tur. Jyl saıyn 80-ge jýyq qyz-kelinshek qaýipti dertke shaldyǵady. О́kinishtisi, naýqastardyń kópshiligi aýrýdyń bastapqy belgileri bilingende emes, dert asqynǵan kezde dárigerge keletin kórinedi. Sondyqtan dárigerler 30-70 jas aralyǵyndaǵy áıel adamdar jyl saıyn medısınalyq tekseristen ótkeni durys dep sanaıdy.
«Jatyr moıyny obyryn ýaqytynda anyqtaýǵa múmkindik bar. Búginde árbir áıel óz turǵylyqty mekenjaıy boıynsha emhanaǵa baryp, tekserile alady. Bul kabınetterdi ashýdaǵy maqsat - obyr dertteriniń túrlerin erte kezeńde anyqtaý. Mysaly, jatyr moıny - kózben qarap, naqty tekserýge bolatyn organ. Bir analız tapsyrsa jetkilikti. Jáne ol qymbat emes»,-deıdi Semeı qalasynyń ıadrolyq medısına jáne onkologııa ortalyǵy dırektorynyń orynbasary Nurgúl Jumyqbaeva.
Nurgúl Jumyqbaevanyń sózinshe, jatyr moıny obyrynyń paıda bolýyna adam pappılomasy vırýsy basty sebep. Tuqym qýalaýshylyqpen de taralyp jatady. Ásirese, otyz jastan asqan názik jandardyń jıi gınekolog mamanǵa qaralyp turǵany durys. Semeıde 7500 adam túrli obyr dertimen tirkeýde tur. Al jylyna 1500 adam jańa obyr dertimen tirkeýge alynady. Sondyqtan, onkologııalyq dıspanser mamandary jyl saıyn skrınıngtik baǵdarlamadan ózge ashyq esik kúnderin jıi ótkizýdi qolǵa alǵan. Búginde ashyq esik kúnine keletinderdiń sany artqan. Shamamen 800-den astam adam tegin tekserýden ótip, nátıjesinde obyr dertine shaldyqqan 3 naýqas anyqtalady.
