Atalǵan tájirıbeniń zııatkerlik mektepterde osymen úshinshi jyl ótkizilip otyrǵanyn aıta ketken jón. Baǵdarlama alǵash ret 2017 jyly Qaraǵandyda bastalyp, oń nátıje kórsetken. Joba negizinen stýdentterdiń jaratylystaný pánderi boıynsha bilimin tereńdetýge, teorııalyq bilimdi praktıka júzinde qoldana bilý daǵdylaryn damytýǵa, salystyrmaly oılaý qabiletin arttyrýǵa arnalǵan. Bıyl elimizde MIT stýdentterin Astana, Almaty, Shymkent, Qaraǵandy jáne Semeı qalalarynyń mektepteri qarsy aldy.
Semeı qalasyndaǵy fızıka-matematıka baǵytyndaǵy Nazarbaev zııatkerlik mektebi dırektorynyń syrtqy baılanystar jónindegi orynbasary Mádı Izmaılovtyń aıtýynsha, sheteldik stýdentter Qazaqstannyń mádenıeti men dástúrin jaqynyraq bilýi úshin jergilikti otbasylarda turýdy ózderine maqsat tutqan. Ejelden qonaqjaılyǵymen tanylǵan otandastarymyz meımandardy qushaq jaıa qarsy aldy.
«Aǵymdaǵy jyldyń alǵashqy aıynda Semeıdegi fızıka-matematıka baǵytyndaǵy Nazarbaev zııatkerlik mektebine AQSh-tyń ǵana emes, álemdegi úzdik bilim ordasynyń biri – Massachýsets tehnologııa ınstıtýtynan is-tájirıbeden ótýge kelgen Djım Maılı Marı Iý Lıang pen Godfrı-Igve Steısı Chıdera 3 aptalyq saparynda 11 synyp oqýshylaryna hımııa, fızıka pánderinen sabaq berdi. Biri – bıoınjenerııa, biri – kólik qurastyrý mamandyqtary boıynsha bilim alyp jatqan olarǵa Qazaqstan beıtanys el. Alǵashqy saparynyń ózinde el men jer tarıhynan, jergilikti halyqtyń turmys-tirshiligi, ómir súrý daǵdysy, salt-dástúri jaıly aqparattarǵa qanyqqan olar qalamyzdaǵy oblystyq ólketaný murajaıy men Nevzorovtar otbasy atyndaǵy óner murajaılaryn aralap kórdi. Jeksenbi kúnderi qala mańyndaǵy shańǵy bazasyna baryp, alǵash ret shańǵy tebýleriniń ózi stýdentterge erekshe áser syılady», deıdi M.Izmaılov.
Massachýsets stýdentteri sondaı-aq Astananyń ásem arhıtektýrasy, Almaty men Qaraǵandynyń kóz tartar tabıǵaty, kóne Túrkistan qalasynyń tarıhy men zııatkerlik mektep oqýshylarynyń alǵyrlyǵynan alǵan áserlerin shynaıy jetkizgen. О́z oıymen bólisken Endrıý Sorenson bul óziniń alǵashqy alys sapary ekenin aıtady. «Men osy ólkemen tanysyp, beımálim Qazaqstandy ashyp jatyrmyn. Qazaqstan – kópultty, tarıhy tereń, halqy qonaqjaı, kishipeıil, erekshe el», deıdi Arqada atqa minip, shańǵymen syrǵanaǵan qyzyqty sátterin eske alyp.
Al Eshlı Ýongqa Astana men qazaqtyń ulttyq taǵamdary qatty unaǵan. «Astanada kún sýyq bolsa da, sáýletiniń sulýlyǵy tula boıyńdy jylytyp jiberedi, zııatkerlik mektep oqýshylary úsh tilde erkin sóılep, amerıkalyq balalarmen salystyrǵanda joǵary synyptarda kúrdeli baǵdarlamany erkin ıgerýleri meni tańǵaldyrdy. Balalar kóp bilgisi keledi», deıdi Eshlı.
Almatydaǵy hımııa-bıologııa baǵytyndaǵy mektepte fızıkadan dáris bergen Hanna Dıl Almatynyń ásem tabıǵatyna, ásirese Ile Alataýyna ǵashyq ekenin jetkizip, Baıqońyrdy kórýdi armandaǵanyn, sol armanyna jetkenin jasyrmady.
Qazir álem jahandanýǵa bet burdy. Aqparattyq-tehnologııanyń dáýirinde bilim salasy da jańa úderisti bastan keshýde. Zııatkerlik mektepterde qoldanysqa engen sheteldik stýdentterdiń elimizde is-tájirıbeden ótýi bolashaq jas mamandarǵa ǵana emes, shákirtterimizge de paıdaly bolyp otyr.
Bul rette Semeı qalasyndaǵy fızıka-matematıka baǵytyndaǵy Nazarbaev zııatkerlik mektebiniń 11 synyp oqýshysy Temirlan Ámirǵazın ótken jyldan beri mektebinde sheteldik stýdentterdiń is-tájirıbeden ótýi dástúrge aınalǵandyǵyn aıtady. «Árıne, ár eldiń, halyqtyń ózindik ustanymdary, qaǵıdalary bar. Baıqaǵanymyz – amerıkalyqtar adamdy tez baýrap alatyn, jyly júzdi el eken. Kele sala til tabysyp, bir zamannyń ókili bolǵan soń ortaq qyzyǵýshylyqta erkin pikir almasyp kettik. Sabaq berý máneri de ózgeshe. Qyzyqty derekter, túrli pikirtalastar sabaqtyń joǵary deńgeıde ótýine áser etti. Maılı men Steısı sabaqtan tys ýaqytta bizge bolashaqta qajet bolar-aý degen dúnıelerden aqparat berip, bilgenderimen bólisti. Mektep jataqhanasy tárbıelenýshilerimen túrli oıyndar ótkizip, bilim deńgeıin kóterýge septesti», deıdi Temirlan.
Mıras ASAN,
«Egemen Qazaqstan»
