Elbasy – Qarýly Kúshterdiń Joǵarǵy Bas Qolbasshysynyń tapsyrmasyna saı engizilgen ózgeristerge sáıkes memleket ıpotekalyq zaemdar boıynsha áskerı qyzmetshilerdiń mindettemelerin óz moınyna alady. Ázirlengen modelge saı 2018 jylǵy qańtardan bastap Qarýly Kúshterdiń áskerı qyzmetshileri ekinshi deńgeıdegi bankterdiń ártúrli baǵdarlamalary aıasynda jeńildigi bar ıpotekalyq nesıeni (zaemdy) paıdalanyp jáne ony kórsetilgen tólemder arqyly óteı otyryp, Qazaqstannyń kez kelgen óńirinde jekemenshik baspana alýǵa múmkindik beretin turǵyn úı tólemderiniń júzege asyrylýyn qarastyratyn zamanaýı júıege kóshirildi. Osyǵan oraı, jańa turǵyn úı zańnamasyn túsindirý, onyń burys túsindirilýin boldyrmaý, áskerı qyzmetshiler men áskerı zeınetkerlerdiń ózderiniń quqyqtarynyń qorǵalýyn qadaǵalaý maqsatynda áskerı prokýratýra ókilderimen birlesken jumys toby Aıagóz, Saryózek, Jarkent, Qapshaǵaı, Sheńgeldi, Jetigen, Almaty, Gvardeısk, Taraz, Lýgovoı, Shymkent jáne Arys garnızondaryna attandy.
Jańa turǵyn úı zańnamasynyń normalaryna sáıkes kúntizbelik esepteýde 2013 jylǵy 1 qańtarda eńbek ótili 10 jyldan asatyn, biraq 20 jyldan kem áskerı zeınetkerler barlyq memlekettik qyzmetkerler men bıýdjettik uıymdardyń jumysshylary sııaqty qaldyq baǵa boıynsha turyp jatqan baspanalaryn jekeshelendirýge quqyly. Alaıda, osy adamdardyń bir bóligi turyp jatqan baspanalaryn jekeshelendire almaıdy. Sebebi ol úı-jaılar jabyq áskerı qalashyqtarda ornalasqan jáne jekeshelendirýge jatpaıdy. Sondyqtan atalǵan sanat úshin memlekettik turǵyn úı qorynan satyp alý arqyly baspanany jekeshelendirýge olardyń quqyqtaryn iske asyrý maqsatynda turǵyn úı zańnamasyna túzetýler engizildi jáne jekeshelendirýge jatatyn baspanany aýystyrýǵa múmkindik berilgen. Eger olar memlekettik turǵyn úı qorynan baspanany menshikke aqysyz alýǵa quqyqtary bar azamattar sanatyna jatsa (Semeı ıadrolyq polıgonyndaǵy ıadrolyq synaq, Aral mańyndaǵy ekologııalyq apat saldarynan zardap shekkender, jaraqat, kontýzııa, mertigý jáne t.b. saldarynan múgedek bolyp qalǵan I jáne II toptaǵy múgedekter), aýystyrylǵan baspanany aqysyz jekeshelendirýge quqyqtary bar.
Qorǵanys mınıstrligi áleýmettik máselelerdi sheshýdegi búgingi kúnniń jaǵdaıyn túsine otyryp, qoldanystaǵy zańnamany basshylyqqa alyp jatyr. Turǵyn úı zańnamasyna jańa ózgeristerdi engizý tájirıbesi jetekshi álem armııalaryn áleýmettik qamtamasyz etýdiń halyqaralyq tájirıbesine saı keledi jáne jetildirýge ári qaraıǵy áleýeti bar.
Baspanamen qamtamasyz etýdiń jańa modeli iske asyrylǵannan bastap Qarýly Kúshterdiń 37 myńnan asa áskerı qyzmetshisi arnaıy shottar men depozıtter ashqan, áskerı qyzmetshilerdiń 2000-nan asa otbasylary elimizdiń túkpir-túkpirinde jekemenshik baspananyń ıeleri atanǵan, jekeshelendirýge jatatyn baspana aýystyrý júzege asyrylǵan qalalar (Astana, Saryózek, Semeı, О́skemen, Taldyqorǵan, Aqtóbe, Aqtaý, Aıagóz, Arys, Shymkent).
