Eksperımentke qatysýshylarǵa negizgi qurylymy birdeı eki túrli ádebı kitap usynǵan. Sıýjeti, avtorlyq stılıstıkasy, mátin tyǵyzdyǵy, tipti keıipkerler de birdeı bolǵan. Eki shyǵarmanyń aıyrmashylyǵy – dekorasııalarynda. Birinshi kitapta oqıǵa realdy álemde ótedi, ekinshisindegi antýraj ǵylymı fantastıkanyń stılinde. Biraq keıipkerlerdiń qımyl-áreketi, motıvasııalary birdeı bolǵan.
Nátıjesinde ǵylymı fantastıkany oqyǵandar keıipkerleriniń is-áreketine tereń mán bermeıtinderi anyqtalady. Olar úshin alańdamaıdy, maqsattaryn túsinbeıdi. Tipti eshqandaı emosııalyq áserge de bólenbeıdi. Ǵalymdar muny ǵylymı fantastıkany salmaqty ádebıet retinde qabyldamaıtyn stereotıppen baılanystyrady. Sol úshin de ǵylymı fantastıka oqyrman sezimine aralasa almaıdy dep túıgen.
Jaqynda Arman Álmenbettiń «Berekeli bıznestiń syry» kitabynyń tusaýkeserinde bilim berýdiń jańa modelin zerttep júrgen Saıasat Nurbek qyzyq derek aıtty. Onyń aıtýynsha, Qytaıda sońǵy on jylda ǵylymı fantastıkany jappaı oqı bastaǵan jáne oqýǵa resmı ruqsat bergen. Oǵan deıin ol janrdaǵy kitaptardy oqýǵa tyıym salynypty. Qytaılyq ınjenerler álemde qandaı tehnıka shyqsa da sony aınytpaı kóshire alady eken. Biraq ózderi jańa nárse oılap tabýǵa qabiletsiz bolyp shyǵady. Al Batys, Amerıka ınjenerleri ǵylymı ındýstrııanyń bıigine shyqqan. Qytaılar sonyń sebebin izdegende, Batys, Amerıka ınjenerleri kitapty, ásirese ǵylymı fantastıkany qatty oqıtyn bolyp shyǵady. Sodan beri olar da ǵylymı fantastıkaǵa jańa jol ashqan. Qazir Qytaı kıno naryǵynda da ǵylymı fantastıkanyń elementteri aralasqan fılmder kóptep shyǵyp jatqan kórinedi.
Baǵashar TURSYNBAIULY,
«Egemen Qazaqstan»
