Osy joly baıyrǵy qyzylordalyq fototilshi Bolat Omarálıevtiń shyǵarmashylyq qorjynyna qol salǵanymyzda bir sýret shyqty.
– Bul kisilerdiń taǵdyry óte aýyr! – dedi fototilshi. – Talaı adamdardy sýretke túsirippin. Biraq osy qarııalardyń qasiretti oqıǵasy esimnen esh shyqpaıdy.
– Qaıbir jyldary gazet jumysynan qolym qalt etkende, tabıǵat kórinisterin, ártúrli fotoetıýdter túsirýdi ádetke aınaldyryp aldym. Sondaı demalys kúnderiniń birinde darııa jaǵalap kele jatyp, jaǵalaýdaǵy qalyń jyńǵyldyń arasynan samannan salynǵan kishkentaı úıdi kórdim. Úıdiń qataryna shaǵyn mal qora turǵyzylǵan. Syrttaı qarasań egesiz úı sııaqty. Jaqyndap kelsem, úı mańynan bireýler qarańdap kórinedi. Qoı, jón suraıyn dep úıge kirgenimde erli-zaıypty qarııalar júr eken.
Bul 1982 jyl bolatyn. Aqsaqaldyń jasy 88-de bolsa, kempiriniń jasy sol kezde 83-ke kelipti. Ekeýi esik aldynda kún shýaqtap otyr eken. Jón surasa kele, aqsaqal Tasbóget degen jerden Syrdarııadaǵy bógettiń qurylysy bastalǵan 1946 jyly kóship kelgenin bildim. Qazaly jaqtyń adamdary eken.
Syrdarııaǵa salynǵan bógettiń qurylysy 1956 jyly bitipti. Sonyń arasynda bul kisiler13 balasymen jabylyp júrip, osy úıdi salyp alǵan eken. Sol on úsh perzenti tegis qaıtys bolǵan. Bireýin at súıretip ketken. Bireýi darııaǵa ketip ólgen... Balalarynyń kóbisi jastaı shetinep ketken. Basqa salmasyn, ul-qyzdarynyń bireýi de qalmaǵan músápir jandar eken, – deıdi sýrettiń avtory.
Osynshama qasiretten keıin qos muńlyq kúldi me, shyndap ómir súrdi me, neni medeý etti, tek ózderine aıan.
«Qudaı bir aınaldyrǵandy shyr aınaldyrady» dep beker aıtpasa kerek. Qyzylordalyq baıyrǵy fototilshi bul az bolǵandaı, olardyń jalǵyz buzaýly sıyryn da túnde urylar buzaýymen qosa urlap ketkenin aıtady. Tipti bul da az bolǵandaı, esiktiń aldynda es bolyp júrgen ıtin de darııa jaǵalap júrgen buzyqtar soıyp jep, terisin tastap ketipti.
Sol zamatta Tasbóget kentindegi, Syrdarııa aýdanynyń basshylaryna baryp osy músápirlerdiń jaǵdaıyn aıttym. Olar qatyramyz, jetim qalǵan qarııalarǵa qaraılasamyz dep maǵan ýáde berip qaldy. Ákimshiliktiń adamdary áne baramyz, mine baramyz dep júrgende shal qaıtys bolǵan, kempirdi aǵaıyndary alyp ketipti...
Bul sýrettiń syry osyndaı.
Aınash ESALI,
«Egemen Qazaqstan»
ALMATY
