- Budan bólek, memleket óńirdegi 12,6 myń kópbalaly otbasyna kómektesý úshin keshendi sharalardy júrgizip otyr, - dedi Altaı Kólginov halyqpen júzdesýinde.
Batys Qazaqstan oblysynda «Altyn Alqa» jáne «Kúmis Alqa» alǵan 7684 ana bar. Odan bólek, 4954 ana 4 jáne odan da kóp bala taýyp, tárbıelep otyr.
«Mektepke jol», «Qamqor» aksııalary aıasynda byltyr oqý jyly qarsańynda az qamtylǵan otbasylardyń 32 myń ul-qyzy 204 mln teńge kóleminde materıaldyq kómek alǵan. 12 myń oqýshyǵa mektep formasyn alýǵa 68 mln teńge qarjy bólingen. Jazǵy lagerlerde 3,5 myń oqýshy demaldy.
Batys Qazaqstan oblysy – elimiz boıynsha 1-4 synyp oqýshylaryn túgeldeı ystyq tamaqpen qamtamasyz etip otyrǵan jalǵyz óńir.
- Degenmen óńirde kópbalaly otbasylar úshin sheshilmegen máseleler bar, - dedi Altaı Kólginov. – Sońǵy kúnderi 2 myńdaı adammen kezdestik, olardyń báriniń muń-muqtajyn tyńdap, baqylaýǵa alyp otyrmyz. Memleketimiz únemi áleýmettik jaǵdaıy tómen ári kóp balaly otbasylarǵa qoldaý kórsetip keledi. Bizdiń qoǵam olardy eshqashan shettetken emes. О́ıtkeni, otbasy qoǵamnyń jaı ǵana bir bóligi emes, búkil memlekettiń negizi. Sondyqtan óńirimizde dástúrli «Meıirimdi kóktem» jobasyn júzege asyrýdy usynyp, barlyǵyn belsendi qatysýǵa shaqyrdym. Atalǵan joba kóp balaly otbasylardy jáne múmkindigi shekteýli jandardy qoldaýǵa baǵyttalǵan. «Meıirimdi kóktem» aıasynda uıymdastyrý ortalyǵy qurylady. Budan bólek oblysta osy sanattaǵy azamattarǵa keńes berý, áleýmettik, quqyqtyq jáne materıaldyq kómek kórsetýge baǵyttalǵan myńnan astam túrli is-shara ótkiziledi. Bizdiń mindetimiz – júıeli túrde jekeleı jáne ár otbasyǵa qoldaý kórsetý, - dedi Altaı Kólginov.
О́ńir basshysynyń aıtýynsha, jaǵdaıy tómen ári kóp balaly otbasylardyń áleýmettik járdemaqy, bilim salasyna qatysty túıitkilder, jumyspen qamtý, turǵyn úı jáne basqa da máseleleri júıeli sheshilýi tıis. Qazirdiń ózinde jergilikti bıýdjettiń barlyq kiris-shyǵysyn esepteý arqyly qosymsha 500 mln teńgeni áleýmettik jaǵdaıy tómen ári kóp balaly otbasylardyń máselelerin sheshýge arnaýǵa sheshim qabyldanǵan.
Qazbek QUTTYMURATULY,
«Egemen Qazaqstan»
Batys Qazaqstan
Sýretti túsirgen Rafhat HALELOV
