Olympic.kz saıtyna suhbat bergen bas bapker qazaq sportyndaǵy ótken jylǵy ózgeristerdiń óz jemisin berip jatqanyn aıtyp, Olımpıada aldyndaǵy josparlarmen bólisti.
«Árıne, jańa júıe qoldanysqa engen soń, azdaǵan qıynshylyqtar kezdesti. Bul tabıǵı prosess. Biraq qazir bizdiń sportta aıtarlyqtaı ózgeris bary baıqalady. Qazirgi sátte qandaı da bir problema joq, bári yńǵaıly. Jumys barysynda qajetti jaıttardyń barlyǵy der kezinde sheshimin tabady», - deıdi Krýglyhına.
«Mogýldan komanda aldyndaǵy basty mindet – Olımpıada oıyndaryna erler quramyn tolyq aparý. Tórtjyldyq dodasyna ár komandadan 4 áıel men 4 er adam qatysýyna múmkindik bar. Biz qyzdar sanyn da kóbeıtýge tyrysamyz. Búginde ulttyq quramaǵa irikteý júrgizilip jatyr. Al erler komandasy tolyǵymen jasaqtaldy, sondyqtan, lısenzııa sanyn tórtke jetkizemiz degen úmit basym. Elimizdegi eń myqty degen sportshylardy álem kýbogi kezeńderi men álem chempıonatyna qatystyrýdamyz», - deıdi bas bapker.
Sondaı-aq, belgili maman álem chempıonatyndaǵy este qalarlyq jaıttardy da atap ótti.
«Álem chempıonatyna biz qarqyndy daıyndyq júrgizdik. Byltyrǵy mamyrdan bastap komanda quramyn jasaqtaı bastady. Biz álem jankúıerlerine komanda kóshbasshylarynan bólek, talantty jas daryndarymyz baryn da kórsetkimiz keldi. Munyń bári Galysheva, Kolmakova jáne Reıherdtiń alańsyz synǵa túsýi úshin jasaldy. Osylaısha, biz álemdik mogýldan alar úlesimiz bar ekenin dáleldedik», - dedi Krýglyhına.
