«Sheep Show 2019» konvensııasy «Wild Sheep Foundation» qorymen birigip uıymdastyrylady. Bul qor álemdegi jabaıy tuıaqty janýarlar men arqarlardy saqtap qalý máselesimen aınalysady. AQSh-tyń Nevada shtatyndaǵy Rıno qalasynda ótken halyqaralyq sharada baǵdarlama avtory ári júrgizýshisi Maksım Levıtın marapattalyp, onyń Qazaqstan jáne Ortalyq Azııadaǵy arqarlardy saqtap qalý boıynsha ázirlegen eńbegi erekshe atalyp ótti» delingen habarlamada.
OutdoorKZ - bul Qazaqstannyń ulan-baıtaq dalasy, kórikti jerleri men jabaıy tabıǵatyna saıahat jasaıtyn baǵdarlama. «Uıymdastyrýshylar bizdiń baǵdarlamany qarap shyǵyp, keıin bizdi konvensııada baıandama jasaýǵa shaqyrdy. Sharaǵa tabıǵat qorǵaýshylary, bıznesmender men tanymal tulǵalar, jalpy sany 1000-nan asa adam qatysty. Biz onda qysqasha beınerolık kórsettik, osylaısha Ortalyq Azııadaǵy janýarlardy qorǵaýǵa arnalǵan jumysymyz syılyqqa ıe boldy», - deıdi Maksım Levıtın.
Onyń aıtýynsha, halyqaralyq tabıǵatty qorǵaý uıymy Qazaqstannyń janýarlar álemin qorǵaý máselesine de basa nazar aýdarady. «Jabaıy janýarlardy ózderiniń tabıǵı ortasynda túsirý ońaı emes. Adam aıaq baspaıtyn jerlerge baryp, aptalap sátti kadr kútesiń. Bul tájirıbe jabaıy tabıǵat týraly bilimiń men televızııalyq sheberligiń bir jerde túıiskende jınalady», - deıdi ol. Baǵdarlamany «Kazakh TV» telearnasynan nemese kazakh-tv.kz saıtynan tamashalaýǵa bolady.
