Osydan shamaly ýaqyt buryn kásipker Qusman Shalabaev osy kartınanyń jalǵasyn qazirgi zamanǵa laıyqtap túsirý ıdeıasyn kótergen edi. Kóp uzamaı áıgili kınonyń jelisimen túsirilgen «Taılaqtyń taqııasy» atty jańa fılm daıyn boldy. Jaqynda sý jańa komedııanyń tusaýkeseri Taldyqorǵan qalasynda ótip, kórermenmen qaýyshty.Kıno jelisi baıyrǵy oqıǵamen sabaqtas órilip, «Taqııaly perishte» Taılaqtyń qarttyq shaǵyndaǵy ómirin beıneleıdi. Bul joly Taılaq súrboıdaqqa aınala bastaǵan súıikti nemeresine laıyqty qyz izdep, jolǵa shyǵady. Kórermenge kóz tanys taqııaly Taılaq aqsaqaldyń áreketi búgingi zamannyń bolmysyn ájýa men astarly aqıqatqa syıǵyzyp, ata-ana men bala, jas býyn arasyndaǵy adamgershilik qundylyqtardy baǵalaý sııaqty qasıetterdi sıpattaıdy.
Fılmniń basty rólin Ádilǵazy Raıymbekov somdaıdy. Sháken Aımanovtyń «Taqııaly perishtesinde» Taılaq bolyp oınaǵan jas akter qazir qadirmendi qarııa. Taldyqorǵan qalasynda turady. Rejısserler bul joly da «Taılaqtyń taqııasy» fılmin halyq súıiktisine aınalǵan akterdy jas urpaqqa jańa qyrynan tanytýdy maqsat tutypty.
– Bul fılmde «Taqııaly perishte» fılmindegi jas Taılaq, búginde seksennen asqan Álimǵazy aqsaqaldyń qazirgi beınesin el-jurtymen qaıta qaýyshtyrdyq. Bıyl sol áıgili kınoda bas keıipkerdi somdaǵan birtýar aktrısa, Qazaqstannyń Halyq ártisi, Memlekettik syılyqtyń laýreaty Ámına О́mirzaqova apamyzdyń 100 jyldyǵy IýNESKO sheńberinde toılanbaqshy. Bir jaǵy jańa kartına áıgili aktrısanyń ónerine degen qurmettiń aıǵaǵy bolsyn dedik, - deıdi ıdeıa avtory jáne fılmniń bas prodıýseri Qusman Shalabaev.
«Taılaqtyń taqııasyna» Álimǵazy Raıymbekovpen qatarQazaqstannyń Halyq ártisi Roza Áshirbekova men Qazaqstannyń eńbek sińirgen qaıratkeri Shynar Janysbekova basty rólge túsken eken. Kıno avtorlary týyndylarymen Kann festıvalinde baq synaýǵa bel býypty.
Qalmahanbet MUQAMETQALI,
«Egemen Qazaqstan»
Almaty oblysy
