Konferensııa «Qazaqstan Respýblıkasy men Koreıa Respýblıkasy arasyndaǵy strategııalyq áriptestikti damytýdyń jańa Soltústik ekonomıkalyq yntymaqtastyǵynyń kórinisi» degen taqyryp aıasynda órbidi. Atalmysh konferensııaǵa Qazaqstan men ońtústikkoreıalyq ǵalymdar men sarapshylar qatysty. Ońtústik Koreıa tarapynan birqatar belgili professorlar, sonyń ishinde dıplomatııalyq akademııa professory Ko Nam Chje, Ense ýnıversıtetiniń professory Ko Tý Sang, Syrtqy ister mınıstriniń Eýrazııa bóliminiń birinshi hatshysy Che Kı Chon jáne basqalary qatysty. Qazaqstandyq taraptan Eýrazııalyq zertteý ınstıtýtynyń aǵa ǵylymı qyzmetkeri Dáýren Áben, qytaıtaný ortalyǵynyń jetekshisi jáne qytaıtanýshy Ádil Qaýkenov, «Elbasy qorynyń janyndaǵy Álemdik ekonomıka jáne saıasat ınstıtýtynyń» Qytaı jáne azııataný baǵdarlamasynyń jetekshisi Rýslan Izimov, «Qoǵamdyq pikir» zertteý ınstıtýtynyń dırektory Botagóz Raqysheva baıandama jasap, pikir almasyp, koreılik taraptyń suraqtaryna jaýap berdi. Osy konferensııada Qazaqstan Respýblıkasynyń Ońtústik Koreıadaǵy Tótenshe jáne ókiletti elshisi Baqyt Dúısenbaev sóz sóılep, Qazaqstan men Ońtústik Koreıa arasyndaǵy dıplomatııalyq jáne saýda-ekonomıkalyq baılanystar men yntymaqtastyqqa keńirek toqtaldy. Konferensııaǵa Qazaqstanda dıplomatııalyq qyzmette bolǵan eks elshi Pek Chý Hen men Tanzanııa elinde elshi bolǵan Son Gym En myrza moderator boldy. Eks-elshi Pek Chý Hen Qazaqstan Respýblıkasynyń halyqaralyq deńgeıdegi bedeline toqtala kelip, memleketimizdiń júrgizip otyrǵan qoǵamdyq kelisim jáne ultaralyq tatýlyq saıasatyna úlken baǵa berdi. Tipti Memleket basshysynyń osy júrgizip otyrǵan saıasaty halyqaralyq qaýymdastyq pen BUU-da zor baǵaǵa ıe bolyp, Pan Gı Mýn BUU Bas hatshysy bolǵan jyldary Qazaqstan saıasatynyń osy modelin nasıhattaý baǵytynda jumystar jasalǵandyǵyn atap ótti. Áıgili dıplomat Prezıdentimizdiń saıasatyna qatty qyzyǵýshylyq tanytqanyn jasyrmady. Osy rette N.Á.Nazarbaevtyń kóshbasshylyq róli men mindetin, ishki jáne syrtqy saıasatta tepe-teńdikti saqtap, alpaýyttar arasynda maıdan qylshyq sýyrǵandaı suńǵyla saıasat júrgizip, TMD elderiniń ishinde erekshe belsendilik tanytyp, Qazaqstannyń bedelin halyqaralyq arenada kótergen basshy retinde joǵary baǵalaıtynyn aıtty.
Konferensııa barysynda koreı ǵalymdary Qazaqstannyń damýy men Ońtústik Koreıamen strategııalyq áriptestiginiń baǵyttaryna toqtaldy. Áleýmettik ekonomıka salasynyń mamany, ǵalym Lı San Chjýn Qazaqstannyń «Nurly jol» baǵdarlamasynyń oń nátıje bergendigin, osy baǵdarlamadan keıin keleside qandaı baǵdarlama shyǵatynyna qyzyǵýshylyq tanytty. Koreıa men Qazaqstan bıznesi yntymaqtastyǵyna qatysty Dáýren Áben «Koreılik kásipkerler qazaqstandyq koreılermen ǵana yntymaqtastyq jasamaı, qazaq kompanııalarymen de áriptestikti keń kólemde júzege asyryp, áriptestik aıasyn ártaraptandyrý kerektigine» basa nazar aýdartty. Koreı ǵalymdary men qazaq ǵalymdarynyń arasynda Ońtústik Koreıanyń Shanhaı yntymaqtastyq uıymyna kirý, kirmeýi týraly da sóz boldy. Taraptardyń oıynsha ol ýaqyt enshisindegi másele. Jalpy, Ońtústik Koreıa eliniń bir kezde «Azııadaǵy ózara yqpaldastyq jáne senim sharalary jónindegi keńeske» kirýge nıeti bolǵandyǵy aıtyldy. Qazirgi tańda ol nıet Úndistannyń múshe bolýyna baılanysty báseńsip, ońtústikkoreıalyq dıplomattardy ártúrli oıǵa qaldyryp otyrǵandyǵy jasyryn emestigi sóz boldy. Alaıda keıingi jyldary eki el arasyndaǵy qarym-qatynastyń burynǵyǵa qaraǵanda saıabyrsyp qalǵandyǵyn, saýda-ekonomıkalyq kórsetkishter joǵarǵy deńgeıde bolsa da, bul mejeni toqmeıilsip, mise tutyp qalmaý kerek degen ǵalymdardyń pikirleri estildi. Qazirgi strategııalyq qarym-qatynasty odan ári jetildirip, jandandyryp otyrý kerektigi, onyń mańyzdylyǵy men ómirsheńdigi týraly oı qozǵaldy. Otyrysta eki el arasynda aldaǵy ýaqytta iskerlik keńes quryp, oǵan elderimizdiń bilikti mamandaryn, koreıtanýshy, ortalyq azııatanýshy zertteýshilerdi, túrli salanyń sarapshylaryn tartý qajettigi basa aıtyldy.
Dastan Aqash,
arnaıy «Egemen Qazaqstan» úshin
Ońtústik Koreıa,
Seýl qalasy
