Malotımofeevka selosyndaǵy áleýmettik qyzmet kórsetý ortalyǵy qurqyltaıdyń uıasyndaı jyp-jyly eken. Ishi-syrty kirse shyqqysyz bolyp jaınap tur. Jańaǵy ázirde terezeden syrtqa qaraǵan keıýananyń keskinin kórgenbiz. Jol qarap turǵan, elegizip áldekimdi tosyp turǵan adamnyń keıpi. Syrttaǵy ersili-qarsyly júrip jatqan, kóńilderinde eshbir kirbiń joq adamdarǵa qarap, biz de sender tárizdi bolǵanbyz dep turǵan tárizdi. Qansha jerden qamqorlyqty kórip jatsa da, kókirekte áldebir saǵynysh sezimderdiń kilkildep tunyp turýy da múmkin ǵoı. Bul ortalyqta qazirgi kúni 180-ge jýyq egde adam turady. Olardyń 116-y zeınetker bolsa, 58-i múmkindigi shekteýli jandar. Jasy toqsannan asqan tórt qarııa osy ortalyqtyń aqsaqaldary men ájeleri. Bir kezde qoǵam baılyǵyn eseleýge tula boılaryndaǵy bar qajyr-qaıratty, kúsh-qýatty sarqa jumsaǵan bes birdeı tyl ardageri bar.
Qarııalar qamqorlyqtan kende emes. Osydan úsh jyl buryn kúrdeli jóndeý jumystary júrgizilipti. Ǵımarattyń ishinen taza da uqypty qoldyń izi baıqalady. Jıhazdar da kóz jaýyn alatyndaı ádemi.
– Sońǵy úsh jylda ınternat úılerine kóp kóńil bólindi, – deıdi oblystyq jumyspen qamtý jáne áleýmettik baǵdarlamalardyń úılestirý basqarmasynyń basshysy Dına Ahmetjanova, – barlyq ǵımaratqa kúrdeli jóndeý jumysyn júrgizdik.
Mundaǵy ortalyq jalpy úlgidegi qarttar úıi eken. Endigi qalǵan ǵumyryn osynda ótkizetin qarttarǵa pedagogıkalyq, mádenıet, quqyqtyq, áleýmettik tárizdi segiz qyzmet túri usynylady. Jaı ǵana kún ótkizý emes, ınternat turǵyndary ár kúnin mazmundy ári maǵynaly ótkizýine aıryqsha kóńil bólingen. Rýhanı jan dúnıeleri oısyraı olqy tartyp, qamkóńilder qajymaý úshin de janashyrlyq jasalýda. Máselen, osy ortalyqtaǵy «Molodýshkı» dep atalatyn ansambldiń kóńil aýlaýdaǵy kórikti isi atap aıtýǵa turarlyq. Ansambl músheleri qazaq jáne orys tilderindegi syrly da sazdy ánderdi shyrqaǵan sátte, asaryn asap, jasaryn jasaǵan egde adamdardyń jan dúnıeleri qorǵasyndaı balqyp, júzderi nurlanyp ketedi eken. Bir jaǵy án qudireti bolsa, ekinshi jaǵynan at jalyn tartyp minip júrgen, biz túsine bermeıtin ótken kúnderge degen saǵynyshtyń sharpýy shyǵar. Ásem ánderdiń kókiregin qolamtanyń shoǵyndaı qyzdyratyn qyzýymen bir jadyrap qalǵan mundaǵy tyńdarman qaýym osy bir sáttiń úzilmeýin qalaıdy.
Qarııalar oblystyq jáne respýblıkalyq deńgeıde aýyq-aýyq ótip turatyn saıystarǵa úzbeı qatysady eken. Máselen, olar dart, kegel, sheńberge dop laqtyrý, doıby men shahmat, toǵyz qumalaq oıyndarynan baq synap, júldeger atanǵan. On márte altyn medal ıelengen. Toǵyz qumalaq oıynynyń has sheberi Janahmet Tumanov aqsaqal Astana qalasynda ótken spartakıadada júldeli orynǵa ıe bolyp, ortaq qordaǵy altyn medaldardyń qataryn kóbeıte túsýge óz úlesin qosqan.
– Astana komandasynyń quramynda oınadyq, – deıdi Janahmet aqsaqal, – Aqtaý, Atyraý, Qyzylordadan kelgen komandalarmen kúsh synastyq. Mereıimiz ústem boldy.
Jeńis degen uǵymnyń qanshalyqty qýanysh syılaıtynyn aqsaqaldyń lebizinen anyq ańǵarýǵa bolatyndaı. Tula boıyńdy shymyrlatatyn shalqar sezimdi sol bir sát jasqa da, kárige de birdeı eken-aý.
Qartaıǵanda qaraýsyz qalý shyn máninde qanshalyqty qasiret. Biraq, bul ózi búgin ǵana paıda bolǵan kórinis emes. Máselen, osy selodaǵy ortalyq sonaý 1935 jyldan beri qyzmet kórsetip keledi eken. Bir áttegen-aıy, alpysynshy jyldardan beri janardan jyraq qalyp, eptep tozǵanǵa da uqsaıdy. Tek 2016 jyly ǵana bıýdjetten 167 mıllıon teńge qarajat bólinip, kúrdeli jóndeý jumystary jasalǵan. Sodan beri joǵaryda biz sıpattaǵandaı jańǵyrǵan, jasarǵan keıipke ıe bolyp, jutynyp tur.
Ortalyqta jalǵyz sport úıirmeleri ǵana emes, jan azyǵy – kórkem ádebıetti de serik etýge ábden bolady. Mundaǵy kitaphananyń qory asa baı jáne birneshe tilde. Qarııalardyń kóńili qalaǵan ádebıetti irkilmeı taýyp alýlaryna ábden bolady.
As-sýyna da, dári-dármegine de ortalyq turǵyndary dán razy. Qyzmetkerlerdiń aıaly alaqandarynyń ǵana emes, izgi júrekteriniń de shýaǵyn sezinip júr. Dál osy jerde alýan-alýan taǵdyr bar. Biri urpaqsyz bolsa, endi biri qaıyrymsyz perzenttiń qaramaı ketken qasiretin tartyp júr. Memleket sol olqylyqtyń ornyn toltyryp jatsa da, terezege úńilgen keıýanaǵa kóziń túskende kókirektegi kórikti oı sútteı irip ketedi eken.
Qalaı bolǵan kúnde de taǵdyrdyń tálkegine ushyraǵan qarııalardyń qaraýsyz qalmaıtyndyǵy anyq. Osyǵan kózimiz jetip turyp, ishteı shúkirshilik aıttyq.
Baıqal BAIÁDIL,
«Egemen Qazaqstan»
Aqmola oblysy,
Selınograd aýdany
