SÝM-nyń...
Keshirińizder, osy bir jyp-jınaqy, súp-súıkimdi, sáýletti ǵımaratty basqasha qalaı atarymdy bilmeı otyrǵanym. Sebebi, onyń eski ataýy qulaǵymyzǵa ábden sińip qalǵan. Tilimiz úırenip ketken. Kózge de, kóńilge de ystyq saýda úıi.
Mine, búgin osynaý ǵımarattyń janynan, kútpegen jerden baıaǵyda-a KazGÝ-diń jýrnalıstıka fakýltetinde birge oqyǵan kýrstas joldasymdy kezdestirip qalyp, qýanǵanymnan qalpaǵymdy aspanǵa atyp jibere jazdadym.
– Oý, – dedi ol da qolyndaǵy sómkesin jerge qoıa sap, maǵan qarap qushaǵyn aıqara ashyp, – sen qaıdan júrsiń-eı?!
Bir qyzyǵy mundaıda ózińniń oıyńa da kelmegen qaı-qaıdaǵy qýaqy ázilderdiń til ushyna qaıdan orala ketetinin bilmeısiń.
– Paı, paı, Almatyǵa siz keledi degendi estip, tań atqaly beri osy jerde kútip júrgen joqpyz ba! – deımin qyljaqtap.
– Qoıshy-eı! – dep yrjııady ol. Tap sol kezde tú-ý baıaǵy jap-jas, súp-súıkimdi stýdent jigitke uqsap ketedi.
– Iá, qaıda barasyń? – deımin men onyń sómkesine bir kóz salyp qoıyp.
– Mine, mynaý, – dep ol kósheniń arǵy betin nusqaıdy, – «Jetisý» qonaqúıine toqtaıyn dep edim.
Endi meniń ezýime kúlki úıiriledi.
– Sen onda toqtaı almaısyń, – deımin qýtyńdap.
– Nege?
– Sebebi sen túsetin «Jetisý» qonaqúıi joq qazir.
– Qalaısha? – deıdi ol ań-tań bolyp. – Qaıda?..
– Ony... – Osy sátte óz ana tilimizdegi «buzyp tastaǵan», ıá bolmasa, «súrip jibergen» sekildi sózderdi aıtýdyń qanshalyqty qıyn ekenin bar bolmysymmen sezingendeı bolamyn. Sóıtemin de, «snosqa ketken» deı salamyn.
– Qa... qalaı? – deıdi ol tutyǵyp.
– Solaı...
Ol endi ún qatpaıdy. «Jetisýdyń» «snosqa» ketkenin kóńiline tym-tym aýyr alyp qalǵandaı qaıta-qaıta basyn shaıqaı beredi.
– E-e, – deıdi álde-e-en soń demin tereńnen alyp. – Men ylǵı da sonda ornalasýshy edim. Kóztanys, kóńilge ystyq jer edi...
– Iá-á, talaı-talaı hıkaıalardy bastan keshken bolarsyń?, deımin men.
– Ol da bar... – deıdi ol muńaıyp. Sonsoń: – Qoı, – dep aıdalada jalǵyz qalǵandaı jan-jaǵyna qarap alańdaıdy. – Basqa jaqqa baraıyq...
– Úıge júr, deımin men onyń qaqpaqtaı jaýyrynynan qaǵyp.
– Jo-o, – dep ol basyn shaıqaıdy. – Áýeli bir jerge ornalasyp alaıyn.
– Qalada qazir ne kóp, qonaq úı kóp, – dep jubatamyn men ony.
– Áı, – deıdi ol bir kezderi «Jetisý» qonaqúıi bolǵan jaqqa qarap. – Biz úshin «Jetisýdyń» orny bólek edi ǵoı...
Sóıtedi de sómkesin qolyna alyp, meniń sońymnan erip júre beredi.
Iá, aıtpaqshy, jolda kele jatyp ózimen-ózi:
– Áı, óstip-óstip bir kúni myna SÝM-dy da súrip tastamasańdar bolǵany... – dep qoıady kúbirlep.
– Jo-joq, ony eshkim de súrmeıdi, – deımin men senimdi túrde. – Qarasaıshy, qandaı myqty ǵımarat!
– Á-á, – deıdi ol ekiushtylaý kúıde. – «Jetisý» da myqty ǵımarat bolatyn! Ásirese bizdiń kózimizge erekshe ystyq kórinýshi edi...
Osy sátte nege ekeni belgisiz, meniń de kóńilimde bir kúmán oıanyp, kózim ashyla bastaǵandaı bolady.
Nurǵalı ORAZ,
«Egemen Qazaqstan»
